Ang bayot ug tomboy - Gula 3

Nagkuyog sila si Lovena ug Mayet. Nanuroy sila kay gusto ni Lovena nga makapahungaw siya sa iyang kaguol nga gibati ngadto sa suod niya’ng amiga nga si  Mayet. Pwerte’ng nakatiyabaw ni Lovena samtang nagsaysay siya kang Mayet sa gidangatan sa ilang relasyon ug sa iyang boyfriend.

“Mora’g dili ko makadawat nga biyaan ko ni Babes,” matud ni Lovena nga nagbakho. Gigakos ni Lovena ang higala niya nga tomboy ug gipaod niya ang iyang nawong sa dughan niini. Wala’y kukauwaw nga mibakho si Lovena sanglit wala’y tawo sa nahimutangan nila sa Plaza Independencia.

Gibati og kaluoy si Mayet sa higala’ng bakla. Nakahukom si Mayet nga hagiton niya si Lovena nga mobarog sa iyang sitwasyon. “Dawata ang kamatuoran Lovena, ayaw na pagpadala sa imong gibati, gamita ang pagbati sa usa ka tinuod nga lalaki nga dili maantigo mohilak,” matud ni Mayet.

Mihunong sa pagbakho si Lovena. Apan panagsa mabatyagan gihapon ni Mayet ang pagkurog sa dughan sa amiga’ng bakla. Adunay nagpadulong kanila nga namaligya og bottled water. Gisinyasan kini ni Mayet nga paduolon. Mipalit si Mayet og duha ka bottled water.

“Sige, inom usa ani’ng bugnaw nga tubig Lovena. Ayaw na’g hilak-hilak diha,” giingnan ni Mayet ang bakla. “Wala ka pa ba kapoya sa imong kahimtang nga usa ka bakla? Ako gikapoy na gani ani’ng akong pagka-tomboy,” matud ni Mayet.  Giangkon ni Lovena nga may mga higayon nga gusto na siya nga mohunong sa pagpakigrelasyon og usa ka lalaki. “Nahuna-huna na bitaw nako Mayet nga undangon na nako ang pagpakabuang og lalaki apan nabalaka ko nga basin og dili nako kaya,” ni Lovena pa.

Gitug-an usab ni Mayet sa amiga niya nga bakla nga siya nagplano na usab nga mohunong na sa pakigrelasyon og babaye kay nakabantay siya nga dili gayud mopilit og dugay kaniya ang sama ra usab kaniya og sex. Nagkasabot sila si Mayet ug Lovena nga magtinabangay pagsulbad sa ilang problema. “Mas maayo tingali nga palabyon nako ang semana ug buwan dili na ako makigkuyog pa og lalaki day,” giingnan ni Lovena si Mayet.

“Gikan karon, ayaw na ko’g tawga og Lovena. Tawga na g’yud ko sa akong tinuod nga ngalan, Macky,” matud ni Lovena. Nakapahiyom si Mayet nga nakadungog sa gisulti ni Lovena kaniya.

“Wow, mora’g tininuod na g’yud na’ng imo day ha? Sige, from now, Macky na ang akong itawag nimo,” matud ni Mayet. (Sumpayan)