Ang bayot ug tomboy

Gula 2

Wala kapugngi sa tomboy nga si Mayet ang pagbahakhak og katawa dihang nasayran niya nga bakla diay ang maanyag nga si Lovena nga sa una niya nga pagkakita nakabihag dayon sa iyang pagbati.

“Laina nimo miga oy, gikataw-an man nimo ang ako’ng byote,” matud ni Lovena nga ingon sa nauwaw. Apan gipasabot si Lovena ni Mayet nga wala’y duha-duha ang iyang kaanyag kay gani nagtuo man g’yud siya nga usa kini ka tinuod nga babaye.

“Ang tinuod day, naibog gani kaayo ko sa imong byote kay hibawo ka na, kami’ng mga tomboy dali ra kaayo nga bation og kaibog kun makakita og maanyag,” matud ni Mayet.

Nagkahigala na hinuon pag-ayo sila si Mayet ug Lovena. “Sige, from now, amiga na ta Lovena. Amigo man mo si Rose, amiga ‘sab ta,” matud ni Mayet.

Nagbayloay sila si Lovena ug Mayet sa ilang mga contact numbers. “Wala ka bay lakaw Ven? Tana, kita na lang tulo si Rose ang magkuyog, magpabugnaw ta sa department store,” matud ni Mayet.

Bisan tuod og bakla si Lovena apan mahinhin ang iyang linihokan mao nga dili kaayo siya dali mailhan nga berde’g dugo. “Mas maayo ‘sab nga nagkaila mo si Lovena day kay kun ganahan ka mosuroy unya dili ko makahigayon, game kaayo ni siya,” giingnan ni Rose si Mayet.

Gikan niadto, nagkasuod pag-ayo ang tulo. Kanunay na sila nga magkuyog ug suod na kaayo nga barkada. Magtug-anay na gani sila sa ilang mga sekreto.

Hangtud nga miabot ang adlaw nga nanawag si Lovena kang Mayet. Naghilak kini nga misaysay sa iyang kagul-anan. Gibuwagan kuno siya sa iyang boyfriend. Giagni ni Lovena si Mayet nga manuroy sila aron pagnaya-naya sa iyang kaguol.

Didto sila magtagbo sa refreshment parlor nga diin didto sila unang nagkita. Hubag kaayo ang mga mata ni Lovena. Sa hilom gibati og kaluoy si Mayet kang Lovena nga iyang amiga’ng bakla.

“Kalma lang day, ingon ana g’yud ang atong lovelife. Ako bitaw nakasuway na ‘sab ana nga gibiyaan ko sa girlfriend nako kaniadto, susama g’yud siya nimo og kaanyag,” matud ni Mayet nga mipagaan sa gibati’ng kasubo sa amiga.

Nakapahiyom si Lovena nga nakadungog sa pagdayeg ni Mayet kaniya. Aron pagwagtang sa kagul-anan ni Lovena, giagni ni Mayet ang amiga’ng bakla nga manuroy sila. “Oki ra man ‘sab nga kita ang magkuyog kay mora man ‘sab ka’g babaye g’yud,” matud ni Mayet. (Sumpayan)