Tinustos nga mapawong kun mabugnawan

Aron pagwagtang sa kalaay ug kamingaw nga nag-inusara lang si Paquito sa ilang balay nga karaan, human sa pagtaliwan ni anhing Ibang kanunay nalang siya nga nagyupyop sa iyang tinustos, diin ang nagtibugol nga aso, iyang masingo deritso sa iyang ilong.

Lanog gud kaayo ang iyang inubhan ug kini kanunay nga hibatian ni Ines, ang dalagang guwang nga ilang silingan ning ilang balangay sa Magsiko.

“Kun ako pay ikaw Paquito, hunongi na kanang imong kanunay nga pagpanabako og tinustos,” ni Ines pa nga mitambag ni Paquito.

“Kinsa man unya ang moatiman kanimo, kun simbako masakit ka, nga ang tanan ra ba nimong mga anak, atua na manimuyo kasagaran sa Mindanao!”

Wa lang kini panumbalinga ni Paquito. Kinsa man sad si Ines, nga motambag kaniya, nga wa man gani sila’y baho nga paryente?

Tungang gabii kadto sa adlaw’ng Sabado. Maoy nasawod sa duha ka dunggan ni Ines, ang way puas nga sinaguysoy sa ubo ni Paquito. Nahingawa na hinuon si Ines, nga nagpaminaw.

“Ayaw lang og laina og sabot Paquito, kun ngano nga misaka ako sa imong balay, nga halawom na kaayo ang kagabhion?” ni Ines pa nga ingon sa nagpunpon sa iyang galamhan ang tumang kabalaka.

“Ilabay kanang imong tinustos sa gawas, aron dili mosamot ang imong hutoy sa ubo?”

Ambot unsang hitaboa ... nga sa dihang gilabay na ni Paquuito ang iyang tinustos, diha may gipakuptan ni Paquito ngadto ni Ines, nga nagkisikisi kay giabot og dili tiaw nga kahibulong?

“Ayaw ug ayaw gayod buhii Ines, ang lain kong tinustos nga mapawong kun mabugnawan!” ni Paquito pa nga may gibaod ngadto sa dalagang guwang.

“Oo ... Paquito ... dili ko kini buhian ug kanunay ko kini nga kuptan!” hupong sa kamatinud-anon si Ines nga nagpunay na lang og hagkom sa gipakuptan ni Paquito.

Sa kalaylay na sa kamot ni Ines, iya kining nabuhian ug kalit lang napawong ang siga sa tinustos kunohay ni Paquito.

“Baliki og kupot Ines, aron  dili na mapawong!” ni Paquito pa nga iyang gidumol dapit sa may bilahan ni Ines.

Gumikan ba kaha sa kakulba nga gibati ni Ines, namugnaw siya ug naunsa bang nitaboa ... nga napawong man og kalit ang tinustos ni Paquito?

Taudtaod ... mibalik ang pag-alisngaw nga kainit sa bilahan ni Ines, ug didto pa hibalik ang kasiga sa tinustos ni Paquito, nga nabugnawan. (Kataposan)