Sulat sa usa ka abogado

Sa unang adlaw sa klase, usa ka abogado nagpadala og sulat sa magtutudlo sa iyang anak. Ang anak mismo ang nagtunol sa sulat nga nagkanayon: “Kinahanglang makat-on gyud siya nga tanang tawo dili kanunay husto o matinud-anon.

Apan tudloi sab siya nga kun dunay salbahis nga tawo, duna say dalagyon. Kun dunay dukirok nga politiko, duna say tarong nga pangulo. Tudloi siya nga sa taliwala sa mga kaaway, duna say mahigala. Ipalayo siya sa kasina kun mahimo. Tudloi siya sa sekreto sa hilom nga agik-ik.

“Itudlo niya nga ang tawong magpaisog-isog maoy daling masugamak. Daniha siya sa kaalam sa mga libro. Apan hatagi’g usab siya’g malinawong higayon sa pagsud-ong sa mga langgam sa kapanganuran, mga buyog ubos sa adlaw ug sa kabulakan sa lunhaw nga bungtod.

“Sa lawak saringan, tudloi siya nga mas bayanihon ang mapakyas kay sa manikas. Dasiga siya nga mosalig sa iyang kaugalingong pangutok, bisa’g ang tanan moingong sayop siya. Tambagi siya nga magmalumo sa mga hinayon, ug magmalig-on sa mga gahi og ulo.

“Hatagi akong anak og katakos sa paglikay sa panon kun ang tanan nagkahiusa sa kawsa nga kadudahan. Tudloi siya sa pagpaminaw sa tanan, apan salaon niya ang kamatuoran. Ug ang maayo lang  iyang sagopon.

“Tudloi siya sa pagkatawa bisa’g nagsubo. Tudloi siya nga dili angay ikaulaw ang paghilak. Tudloi siya sa paglikay sa hinawayon ug magbantay sa ulog-ulogan. Tudloi siya sa pagpangita’g kinatas-ang suhol sa iyang braso ug kaalam. Apan way presyo ang iyang kasingkasing ug kalag.

“Tudloi siya sa pagsira sa iyang dunggan sa pundok nga nagsiyagit, ug sa pagbarog ug pakigbisog sa iyang gitohoang husto. Ayoha siya pagdala. Apan ayaw sab og luagluagi. Kay pagsubo sa kalayo lang ang makalig-on sa puthaw.

“Hatagi siya’g kaisog nga magsukitsukit. Kanunay isilsil sa iyang alimpatakan ang pagbaton og kaugalingong pangisip ug pagsalig sa kaugalingon. Kay sa ingon makabaton siya’g pagsalig sa katawhan.

“Usa kini ka dakong tahas. Apan sutaa unsay imong mahimo.Usa siya ka buotang bata, akong anak lalaki, si Abraham Jr. (Pinirmahan) Abraham Lincoln.” (Kataposan)