Ang gitukar ni Tibong
Peep! Paap!†Eek! Aaak! Pep pap Ek Ak.†Mao ni tingog sa selendron o harmonica nga gipatukar ni Tibong. Daw gitangag niya ang tulonggon nga nagpilit sa iyang mga ngabil. Suyop-tayhop ang gibuhat niya niini karong buntaga.
Nagbarog siya sa island, duol sa eskina sa Gorordo Avenue ug Mango Avenue, di layo sa eskuylahan sa Inmaculada Concepcion ug sa Jollibee. Nia siya dinhing dapita nanaygon o nagpakilimos. “Pep-pap Ek-ak Pep-pap Ek-ak,†nagkanayon iyang selendron. Inig-hunong sa mga sakyanan sa habig sa Gorordo, moduol dayon si Tibong sa mga sakyanan.
Naggunit iyang walang kamot sa harmonica samtang sigeng tayhop-higop, ang iyang toong kamot magkangkang daan aron pagdawat kun dunay motunol.
Kapin kun kulang trayenta ka gutling iyang ikangkang tungod sa mga sakyanan. Kun hatagan na si Tibong, mobiya dayon siya, mobalhin sa laing sakyanan, dili niya humanon kung unsang sonata iyang gitukar. Kun di sab siya hatagan sulod sa maong gidugayon, mobalhin na lang siya’g duol og laing sakyanan.
Unya, may namay-ongan si Tibong nga Mitsubishi Adventure nga pula. Kanunay gyud mohatag niya’g piso ang drayber niini. Sagad alas siyete medya sa buntag ang takna inig agi dinhi sa maong sakyanan. Karon, nia na sab. Maoy pag-hunong kay mao say pagpula sa traffic light.
Mga lima ka higayon na nga nihatag ni Tibong og piso ang drayber sa maong sakyanan. Di gani tingali kadungog ang drayber sa gitukar ni Tibong. Kay inig duol niya sa kilid sa sakyanan, motunol man dayon ang drayber.
Karon, lahi ang gibuhat sa drayber pagduol ni Tibong. Giabli gyud ang tibook bintana sa wala sa drayber. “Bi, kono, bay. Paghuman og usa ka kanta o sonata. Dugay pa mang mo-berde ang traffic light, kay bag-o pa mang nipula. Hatagan tika’g singko pesos kada usa ka sonata,†pulong sa drayber.
“Ok ra nang peso, sir,†tubag ni Tibong. “Ngano man?†pangutana sa drayber nga naisang kilay. “Mao ra man ni akong nakamaohang tukar,†butyag ni Tibong. Ek-ak pep-pa Ek-ak Pep-pap,†ni Tibong nga naghikohiko nga nagtukar. Di diay masabot kun unsang matanga sa musika. “Ha ha ha ha....!†bahakhak sa drayber nga nagtunol og piso. (Katapusan)
- Latest
