Ang kaanyag ni Nimpa mangtas

Dinhi sa sityo Tunok-Kagingking may usa ka dalaga nga dunay talagsaong katahom ug kining maong dalaga mao si Nimpa ang anak sa magtiayong Lucio-Tintay. Nindot og lawas si Nimpa, puti ang pamanit, may barog, taliwtiw ang ilong ug may mga ngabil nga mora’g nagpangamay nang daan nga kini buot nang hagkan, apan wala’y pangahas kay mora’g may pagka-estrikta kini si Nimpa.

Daghan kaayong nangulitawo kaniya. Hinuon, iya mang atubangon ang kutob maninguha sa iyang gugma nga moanha sa ilang balay aron mamisita kaniya. Ang dako gyud kaayo’g gugma kaniya nga igo lang magpaatbang sa ilang balay mao si Tanong ang anak nilang Benigno-Gualda nga manghimoay og silyang kawayan dinhi sa sityo.

Ug gawas kang Tanong anaa pa gyud ang bugoy nga anak sa Kapitan dinhi sa ilang balangay nga si Mariano. Dunay daghang barkada si Mariano ug kausa dihang nag-inom sila, namulong kini ngadto sa iyang mga barkada.

“Mga parts, abi ninyo duna koy plano nga akong atngan kana si Nimpa sa awaaw’ng dapit sa atong sityo kun mag-inusara lang siyang maglakaw, he, he, he, katilaw gyud na siya nako,”  ni Mariano pa nga miyarok sa baso nga puno sa bino. “Ugma, makita niya kun kinsa si Mariano dinhi sa sityo Tunok-Kagingking, matunok gyud na siya nako nga way oras...”

“Ayaw gyud kompiyansa, Nimpa,” ni Lucio pa ngadto sa anak nga dalaga. “Daghan ra bang naibog nimo dinhi sa ato, unsaon nga gipakatawo ka mang guwapa kaayo, busa, maayo gyud nang imong dad-on kining akong pinuti, aron duna kay ikaparang sa mga lalaki nga buot moangkon sa imong pagkabulak.”

“Aw, katilaw gyud sila nako, Tay, kay tigbason man gyud nako,” niini pa nga mipahiyom.

“A, kining, Lucio, unsay maayo’g imo na lang hatagan si Nimpa sa imong kabilin,” ni Tintay pa ngadto sa bana.

“Wala pa man siya’y desi otso anyos, dili mahimo,” hinay ang tingog ni Lucio.

“Desi otso na ko, Tay, uy. Nalimot ka nga nag-debut man ko adtong miaging buwan?” mitan-aw si Nimpa sa amahan. Tuod, usa ka gabii samtang naglakaw si Nimpa subay sa dalan nga mingaw kaayo, kalit lang may miatang kaniya sa dalan tulo ka lalaki nga nanagtaptap sa nawong.

“Maangkon na gyud ka nako, Nimpa,” sa usa ka lalaki pa dayong duol kang Nimpa apan nahaatras kini dihang giisa pagkalit ni Nimpa ang dala niyang pinuti ug andam na siya sa pagtigbas.

“Uy, pinuti lang, way problema na namo, sige, Bay Toryong, maayo ka man sa arnis, judo ug karate, dasmagi dayon kanang bayhana aron atong maangkon ug unya atong lugoson!” Huboan na unta nila si Nimpa sa sinina niini dihang may misinggit, si Tanong. Nagdala kini’g hait sad kaayong sundang.

“Aha, inyong lugoson si Nimpa, sige, lugosa ninyo kay tabas-tabas gyud mo ning akong pinuti!” matud ni Tanong. Sa silangang bahin sa kalibotan migitli ug misubang na ang takdol nga buwan ug kalit lang mingulob si Nimpa ug nahimong usa ka itom ug dako nga iro,” hutdon ko kamo’g patayyy...mga manglulugosss!”

Si Tanong nga nakakita sa gibuhat ni Nimpa mihana og lakaw aron magpalayo apan gisinggitan siya ni Nimpa kinsa nahibalik na sa pagka-normal nga tawo.“Hoy, Tanong duolll!”

Miduol si Tanong. “Ni-nimpa, ungo diay ka, ungo diay mo’g kaliwat?”

Oo, ug kay imo mang nasaksihan ang akong gibuhat, kinahanglan nga wala kay nakita ug wala kay nadungog, okey ba, ha, Tanong?”

“Nakagusto ka nako, Tanong ug ako sab dunay gusto nimo, busa, magpabiling tinagoan ang imong nahibaw-an bahin nako. Ug karon, manglakaw na ta, magkuyog na ta paingon sa among balay.” (Kataposan)