Linog nga dili makauyog
Gipangulbaan na si Uray Iska, nga nakasigpat nila ni Mimay ug Goryo, nga hilom kaayo kini nga nanulod sa sibay. Kasal man gud nila karong adlawa, diin gumikan sa kadaghan nila’g bisita, nga gipangimbitar, nalangan ang ilang pagdigamohay, isip bag-ong magtiayon ning ilang balangay sa Pitalo.
Wa na lang timbayaha pa ni Uray Iska, ang iyang anak nga dalagang guwang, nga wa lang hibaw-i minyoan ni Goryo, nga makaupat na mabiyudo.
Kinsa man sad gud ang dili panguyawan, nga sa bag-o pa silang gikasal si anhing Bador, wa man siya makabangon og upat ka adlaw, gumikan sa kaluhag sa naanhing niyang bana, nga kun masubrahan, mauyog gayod ang ilang pinuy-anan nga gipuy-an, kay subra pa man kakusog sa linog?
Misunod na lang usab dayon si Uray Iska, sa pagsulod sa may pikas sibay, aron paniiron ang umaabot nga kombatihay sa bag-ong magtiayon, nga magbinuakay og pakwan sa may dakong lantay.
Gibati na lang og kahapdos si Uray Iska sa iyang bukton, nga napulos pinahitan sa lamok ug kuting, apan wa gayod siya’y nabati nga kasikas sa may sulod sa sibay?
Sa iyang hunahuna, imposible sad nga mosayo silang duha pagpangatulog ug maglumba na lang og hagok? Halandumon gud kaayo karon sa unang gabii sa ilang kasal?
Wa makaagwanta si Uray Iska. Mibangon ug maampingon nga misulod sa gihigdaan sa bag-ong magtiayon. Namudlat ang duha ka mata ni Uray Iska, nga iyang hiabtan si Mimay nga nagpunay og pamukaw ni Goryo nga nahinanok?
“Tuktugaokkkk ... tuktugaokkkkkk!†kaadlawon na diay kay nanuktugaok na man ang ilang mga manok.
Mibalik na lang si Uray Iska sa may pikas nga sibay, aron mobalik sa paghigda.
Ambot unsang pagkaunsaa ... mibundak man ang makusog nga ulan. Kusog kaayo ang dinagayday sa sapa, ilabi na nga niadtong tungora nagbaha?
May panagsang inagunto ang nasabak sa dunggan ni Uray Iska. Maampingon siya nga nagpaminaw. Sa iyang hunahuna ... naduslakan na gayod si Mimay, kay mao may iyang nabati ang daghong nga tingog sa iyang anak nga nagkanayon:
“Sige .... paaaa ... Goryoooo .... iduoottttt .... paaaa angggg ... haliggiiii .... aronnnn matul-iddddd ogggg tarongggg!â€
Mao na lamang ang naabtan ni Uray Iska, nga si Goryo ug si Mimay, nagtinabangay og duot sa haligi sa ilang balay, nga mitahirig nga gibanlas sa sulog sa baha. (Kataposan)
- Latest
