Isla Paraiso

May katarongan usab si Padre Judas sa mga hunahuna nga gipadayag niini kaniya.

Babaye ang madre superyor. Lahi kini kang Padre Judas nga usa ka lalaki. Nagtuo siya nga mas nakasabot ang madre superyor sa iyang kahimtang sanglit usa  kini ka babaye nga sama kaniya. Si Padre Judas nakasabot usab kaniya, apan lahi ang pagtan-aw niini sa iyang kahimtang. Mao kini ang mga komplementaryo nga gigaling sa iyang hunahuna.

Apan ang ulahing gipamulong ni Padre Judas dili gayod malaksi sa hunahuna ni sister Veronica. Sama kini sa usa ka pana nga mitagdoy sa iyang kaisipan. Mora ba’g may bahin sa iyang pagkatawo nga nadiskubrehan sa mga pulong nga giluwatan sa mga ngabil sa pari nga iyang higala.

“Talagsa ra ang mga binuhat nga gitugahan sa kahigayonan nga makaalagad sa Diyos, sister Veronica. Diyotay ra ang pinili sa daghan nga gipangtawag. Ug bulahan ikaw nga usa ikaw sa napilian. Karon...kun moluwat ka sa imong bokasyon, sama da sa giusikan mo ang mabulokong kahigayonan nga gihatag sa Diyos kanimo. Ug anugon kaayo, sister Veronica, tungod kay kausa ra moabot sa atong kinabuhi ang suwerte, sumala sa karaang panultihon.”

Kini ang mga pulong ni Padre Judas ang nagdulot kaniya’g kalibog ug kahasol. Gitukmod siya niini ngadto sa halawom nga paghunahuna. -- Sumpayan pa