Dear Tita Salie,
Hello! Ug maayong adlaw, tagoa lang ko sa pangalan nga Shyla Thea, 20 years of age ug usa ka dalaga.
Kining akong problema mahitungod kini sa akong silingan nga crush kaayo nako. Ganahan gyud kaayo ko motan-aw kaniya, Tita Salie.
Tungod lagi kay love kaayo nako kining tawhana ako na gikatugyan kaniya ang akong pagka-babaye ug tulo na ka higayon nga nahitabo kini.
Nasayod ko nga duna siya’y uyab, apan unsaon man nako nga love man nako siya. Magselos ko kun makakita ko nila sa iyang girlfriend nga magkuyog. Ug dili ko segurado kun love ba ko niya, Tita Salie, or gigamit lang ko niya.
Tita Salie unsa may akong buhaton aron mahunong na kining akong pagpakabuang? Palihog pasabta ko. Daghang salamat sa imong pagtagad ning akong problema.
* * *
Shyla Thea,
Palihog lang hatagi pud intawon og bili ang imong kaugalingon. Ayaw gub-a ang imong pagkatawo ug ang imong dungog tungod lamang nianang imong gugma. Ug kun gusto ka nga respetohon ka sa ubang mga tawo hatagi pud og respeto ang imong kaugalingon.
Busa ayaw na pagpakabuang sa imong gibati ug ayaw na intawon pagpakabuang nianang maong lalaki nga wala’y klaro kun nahigugma ba kanimo.
Tinuod nga natural lang ang mo-admire ug maibog. Apan dili na kini maayo kun ato na nga itugyan ang atong kaugalingon sa ingon kasayon. Busa i-control intawon ang imong kaugalingon, ayaw na kasugot nga sa laing higayon iya na usab ikaw’ng gamiton. -- Tita Salie