Bayad sa Pagtabang - Gula 3

Pagka hapon, wala damha nila ni LynLyn ug Kent nga mahiabot didto sa ospital ang mga ginikanan sa dalaga. May nakapahibalo diay kanila nga naaksidente si LynLyn kay nakit-an ang motorsiklo niini nga gigaid didto sa tindahan ug ang tag-iya sa tindahan maoy mitug-an nga ang nagmaneho sa motor naaksidente. “Nalukop-lukop namo og suroy ang mga ospital. Didto mi nag-una pagsusi sa Vicente Sotto kay kinsa may nagtoo nga dia ka dinhi dad-a nga mahalon man kini nga ospital ang Chong Hua,” matud sa inahan ni LynLyn.

Pwerte nga nakapasalamat sa mga ginikanan ni LynLyn ngadto ni Kent nga giatiman ang ilang anak. “Pahibaw-on nato si Gerald nga naaksidente ka aron iya kita nga tabangan Lyn,” matud sa inahan nga maoy mas tabian sa mga ginikanan sa dalaga. “Kinsa kana si Gerald manang?” pangutana ni Kent sa inahan ni LynLyn. Gitug-anan si Kent sa inahan sa dalaga nga si Gerald maoy boyfriend ni LynLyn ug gani nagkasabot na sila nga magminyo kun mauli na gikan sa abroad.

Igo lang miyango-yango si Kent nga naminaw. “Ang problema lang kay wala kita’y kontak ngadto ni Gerald. Asa kaha kita og ibayad sa ospital Lyn,” daw mihulma ang kasubo sa panagway sa mga ginikanan ni LynLyn.

Dali nga misagbat si Kent. “Ayaw kabalak-i ang bayranan Nang, Nong. Ang importante nga luwas si LynLyn. Sagdi lang, tabangan ko kamo pagpangita og ikabayad sa ospital,” matud ni Kent. Nananghid si Kent nga mobiya usa apan mipasalig nga mobalik. “Maayo kay dia na kamo, molakaw usa ko Nong, Nang kay mangita ko og kwarta nga ikabayad nato sa ospital.”

Pagtalikod ni Kent, siya maoy gisumsoman sa panaghinabi sa inahan ug sa iyang mga ginikanan. Gisugilon ni LynLyn ngadto sa iyang mga ginikanan nga human siya maaksidente, naagian siya ni Kent.

Buntag na nga mibalik si Kent sa ospital. Nagdala kini og mga prutas ug ubang kinahanglanon sa dalaga. “Nagtagad ka pa g’yud Kent. Daku na kaayo ko og utang kabubut-on nimo,” matud ni LynLyn. Anam-anam na nga mibaskog pagbalik ang panglawas ni LynLyn. Dunay miabot nga doctor nga mihiling ni LynLyn. Giingnan sila nga pwede na nga makagawas ang dalaga sa ospital.

Inay malipay, nasagmuyo si LynLyn ug ang iyang mga ginikanan. Nakasabot si Kent nga naproblema sila tungod sa bayranan.

 â€œAyaw kamo kabalaka sa bayranan Lyn, ako na’y bahala,” matud ni Kent.    Mitutok kang Kent si LynLyn. Nagkatinutokay sila si Kent sa una’ng higayon. – (Sumpayan)