Bayad sa pagtabang

Nag-inusara lang si Kent nga nagmaneho sa iyang kotse balik dinhi sa dakbayan sa Sugbo human sa pagbakasyon niya sa ilang lungsod sa Santander atol sa semana santa. Nagkaduol na si Kent sa usa ka bahin sa karsada sa lungsod sa Dalaguete. Halandumon kaayo kini’ng dapita alang kang Kent kay dinhi sila una nga nagkita si Lynlyn. Gipahunong ni Kent ang iyang kotse daplin sa karsada tumong gayud sa landong sa kahoy. Milakaw siya sa unahan diin didto niya gitabangan pagpatindog si Lynlyn human maaksidente sa gimaneho niini nga motor. Gilab-as ni Kent sa iyang panumdoman kadtong mga panghitabo upat ka tuig na ang milabay. Nagping-it sa kasakit si Lynlyn tungod sa mga garas ug bun-og nga nahiaguman human madakin-as ang iyang gimaneho nga motorsiklo ug wala pa’y nakatabang kaniya. Bag-o pa g’yud nga naaksidente si Lynlyn dihang nakit-an siya ni Kent nga nagsunod ra tingali kaniya og dili halayo nga distansya. Nahinumdoman ni Kent nga nagdali siya nga nanaog sa iyang kotse pagkakita sa babaye nga naglingkod sa karsada. “Dali sakay diri sa kotse kay dad-on tika sa ospital miss. Daghan kaayo ka’g samad,” giingnan ni Kent ang babaye. Natan-awan ni Kent nga adunay kadena nga gibaliktos sa likod nga bahin sa motor. “Yuna, ibilin usa nako kining imong motor sa payag nga anaa sa unahan. Mobalik dayon ko,” giingnan ni Kent ang babaye. Dali ra tuod kaayo nga nahibalik si Kent.

“Ayaw kabalaka miss, dili ko dautan’g tawo. Ako si Kent,” iyang giingnan ang babaye nga naghilak sa kasakit. “Higda lang diha miss. Yuna, unsa’y ngalan nimo miss?”

Paspas nga gipadagan ni Kent ang kotse paingon sa Isidro Kintanar Hospital sa lungsod sa Argao aron madapatan dayon kini og first aid. “Angay’ng dad-on ni siya sa ospital sa siyudad,” matud sa doktor nga una’ng miatiman kang Lynlyn. Si Kent lang gihapon ang midala ni Lynlyn sa ospital dinhi sa dakbayan sa Sugbo. Sa front seat niya kini gipalingkod aron makairag kini ug makahigda samtang magdagan ang kotse paingon sa dakbayan.

“Ayaw kabalaka Lyn, dili ko ikaw pasagdan,” giingnan ni Kent si Lynlyn. “Wala ra ba ko’y kwarta,” matud ni Lynlyn. Nakatulog si Lynlyn samtang nagdagan ang kotse.

Matag karon ug unya gipasiklapan ni Kent si Lynlyn. Naluoy si Kent nga daghang bun-og ug samad nga naangkon sa iyang mga bukton ug tuhod kay nagisi gani ang gisul-ob nga karsones-maong nga maoy nabagnos sa karsada sa iyang pagkatumba.   (Sumpayan)