Biyahe sa Manila - Gula 5

Namiya sila si Alex ug Janet sa hotel. “Asa man ta karon Jan?” gisukna ni Alex ang dalaga.  “Gusto ko nga mag-disco ta. Total nine o’clock pa ang ako’ng flight ugma balik sa Cebu,” ni Janet. “Kun mao, magkasakay diay gihapon ta Jan? Ugma ‘sab ko mopauli sa Cebu,” matud ni Alex. Misakay sila’g taksi. Si Janet maoy migiya sa drayber kun asa sila nga diskohan moadto.

Sa diskohan wala magpabentaha si Alex kang Janet. Bisan og panagsa ra nga mag-disco si Alex apan angayan kaayo siya kun mopakiay-kiay na sa iyang lawas.

Mora’g isda’ng lubay-lubay ang lawas ni Alex nga mokiay-kiay dungan sa tugtog nga ilang gisayawan. Panagsa, ibangga-bangga nila ni Janet ug Alex ang masi’g nila ka mga sampot samtang magsayaw.

Nakabantay sila nga adunay uban nga didto sa diskohan nga misud-ong pag-ayo kanila. Human sa taud-taud nga walay hunong pagsayaw, mipahuway sila si Alex ug Janet.

Pareho nga nag-abot ang ginhawa sa kakapoy sa pagsinayaw, apan enjoy kaayo sila’ng duha. “Moinom ka ba og light beer Jan?” gisukna niya si Janet. “Pwede ra Lex, basta dili la’ng daghan,” ni Janet. Gitungab dayon ni Alex ang botelya sa beer.  Miinom usab si Janet. “Lingaw man diay kaayo kini’ng Manila suroyan kun duna ta’y kauban Jan?” matud ni Alex nga mitutok ni Janet. “Bitaw, nindot ‘sab diri suroyan kay walay nakaila kanato,” sanong pa sa dalaga.

Gipasumbingayan ni Alex si Janet kun wala ba kini boyfriend. Prangka kaayo si Janet. “Duna ko’y boyfriend sa Cebu pero walay lami kay tagsa ra kaayo mi magkita Lex,” ni Janet pa. “Bisan sa text, dili gani mangumosta. Naa tuod ko’y boyfriend pero sama ra gihapon sa wala,” dugang pa ni Janet. May gamay’ng pagmahay ang tuno sa iyang sinultihan.

Gisakyan ni Alex ang sitwasyon. “Klaro kaayo nga wala siya mahigugma nimo Janet. Maayo pa’g imo siya nga ilisan,” nagpahiyom si Alex. “Kinsa may ako’ng iilis kaniya nga wala may laing nanguyab?” matud ni Janet.

Gitutokan niya ang dalaga. “Kun ako, pwede kaha nga maoy ihulip nimo sa iyang dapit?” Nakapahiyom si Janet nga mitutok ni Alex. Daw nagsultihanay ug hilom nga nagkasabot ang ilang mga tinan-awan. Gigunitan ni Alex ang kamot sa dalaga. “I love you Janet.”      

Gipiyong ni Janet ang iyang mga mata. “Katulgon na ko Lex uy. Tana mamauli na ta,” ni Janet pa. Sa taksi, nagtupad sila paglingkod sa luyo nga lingkoranan.

May gihunghong si Alex kang Janet nga iyang giagbayan.     “Pwede ba og adto lang ta mangatulog sa hotel?”

“Mas maayo pa kay katulgon na g’yud kaayo ko Lex,” paraygon ang tingog ni Janet nga migakus ni Alex. – (Kataposan)