Biyahe sa Manila - Gula 4

Kataposan na’ng adlaw sa gitambongan nga seminar ni Alex. Kapoy kaayo siya sa milabay’ng tulo ka adlaw kay gisabot gayud ni Alex ang mga isyu nga gituki sa seminar kay pahimoon ra ba siya og report sa ilang manager.

Libre na unta siya nga maglakwatsa niining gabhiona. Nagmahay si Alex nganong wala niya pangayoi og contact numbers si Janet. Ang babaye ra maoy gihatagan niya og calling card nga adunay iya nga contact numbers.

Naligo si Alex sa bath tub aron pag-angkon og kabugnaw sa iyang lawas. Nadungog niya nga mi-ring ang telepono sa kwarto apan dili niya kini matubag kay naghumol pa siya sa tubig. Human og kaligo ni Alex, nag-brief ra siya ug naghayang paghigda sa iyang hunol-hunol nga higdaanan.

Mi-ring ang telepono. Ang operator sa hotel diay ang nanawag ug nagpahibalo nga  mitawag sa information si Janet og nagbilin sa iyang contact numbers. “Salamat kaayo miss,” giingnan ni Alex ang operator. Gikuha ni Alex ang iyang cellphone. Nahibulong tuod si Alex kay sukad sa iyang pag-abot sa Manila wala gayud siya makadawat og bisan usa ka text message. Gi-off ni Alex ang iyang cellphone, unya gi-on pag-usab.

Diha-diha nag-ulhos-ulhos lang pagsulod ang daghan kaayo nga mga text messages. Daghang messages nga gikan sa usa lang ka numero – gikan ni Janet nga nagpaila nga mao kini ang iyang number. Taud-taud, mi-ring ang cellphone ni Alex. “Hello, is this Alex?” paraygon nga tingog sa usa ka babaye ang didto sa pikas.

“Ako kini si Janet? Sori ha, na-bisi ko pag-follow up sa transaksyon sa Camp Crame. Karon pa g’yud ko nahuman. Ikaw, kumusta, dili ba tulo ra man ka adlaw ang inyo nga seminar?” matud ni Janet.

Dali kaayo nga nagkasabot sila si Janet ug Alex nga mag-outing nianang gabhiona. “Sige maglingaw-lingaw ta kay human na man ang atong kaakohan,” matud ni Janet. Nagkasabot sila nga si Janet na ang moadto sa hotel nga giistahan ni Alex.

Nagpaabot na sa lobby sa hotel si Alex diha’ng hapit na ang alas nueve sa gabii nga maoy ilang gikasabotan. Excited kaayo si Alex niini’ng ilang deyt ni Janet. Apan wala pa siya masayod kun asa sila manuroy kay wala masuheto si Alex sa Manila.

Tuod, miabot si Janet. Nakapanglad-ok sa iyang laway si Alex nga nagtan-aw ni Janet nga nag-short pants lang ug ang gisul-ob niini nga red blouse, gisapawan niya og itom nga jacket nga wala sirad-i ang atubangan nga bahin.

Alang ka’ng Alex, matintalon kaayo ang pamorma ni Janet. – (Sumpayan)