Giagbayan sa amigo

Dear Tita Salie,

Have a wonderful day. Nalipay ko og dako nga dunay column nga sama niini. Kay duna na tay kasultihan kun kita manginahanglan og tambag.

Ang akong problema kabahin kini sa lalaki nga akong gihigugma pag-ayo sa tibuok nakong kinabuhi.

Mananagat ang akong uyab, Tita Salie, ug didto sila managat sa laing dapit. Apan duna mao siya’y nadunggan nga estorya bahin nako. Nga kuno duna koy laing uyab bisan dili kini tinuod. Nakit-an ko sa iyang ante nga giagbayan sa akong amigo nga lalaki ug mao ra kadto ang iyang gibasehan.

Sakit kaayo alang nako, Tita Salie, kay gimahal nako siya pag-ayo. Iya kong giteksan nga bulag na mi apan wala ko mosugot. Nagsige ko’g hangyo apan dili na gyod siya, Tita Salie. Unsa may akong buhaton? Palihog pasabta ko. Thank you so much and more power.

* * *

Hello! Kini usa ka leksyon nga angayan natong tan-awon. Dili man usab nato mabasol ang imong uyab tungod kay sakit alang kaniya ang estorya nga iyang nadunggan.  Maayo lang unta to kun imong ig-agaw o paryente ang maong lalaki nga miagbay kanimo. Apan kun dili nimo kadugo, natural lamang nga magduda siya kun unsay anaa kaninyo.

Likayan gyud nato kining ingon niini nga mga gesture labina kun duna tay uyab o minyo na ta. Kay bisan man kun wala tay daotan nga gibuhat, dili nato control ang hunahuna sa uban nga nagtan-aw kanato nga maoy kasagaran nga hinungdan sa away ug panagbulag sa uban.

Pabugnawa lang una ang iyang kasuko ug ayaw una pugsa. Pasagdi siya makahunahuna ug makaamgo kun unsa ka kabililhon kaniya. Igo na nga imong i-explain kaniya ang nahitabo ug pangayo’g pasaylo. -- Tita Salie