Isla Paraiso

Gula 146

Unya kalit lang nakaginhawa’g luag si Rey dihang nasuta niya nga ang mga kaubang polis diay ang iyang nakita. Naseguro niya kini gumikan sa puting panapton nga gibangan sa ilang mga ulo.

Dihadiha nidali si Rey pagduol kanila.

“Sir,” misugat kaniya si Corporal David Benturada, “may nakaikyas sa mga tulisan.”

“Damn it!” Napahit ni Rey ang iyang wait. Mibati siya’g kapikal nga wala niya mahurot pagpatay ang mga tulisan.

“May pipila usab sa atong mga kauban nga nakaangkon og minor injuries,” dugtong ni Benturada.

“Ang gikasub-an ko lang Benturada,” ni Rey pa, “mao ang gidangatan ni Sarhento Ayop. Nakalas gayod ang iyang kinabuhi.”

“Apan daghan sab ang atong napatay sa mga tulisan, Sir,” ni Benturada.

“Tinuod kana, Benturada. Apan wala ko makontento niining hitaboa. Gusto ko nga mahurot silang tanan.”

“Nausahan gihapon kita sa mga tulisan, Sir. Nakapangandam na diay silang daan sa atong pag-abot.”

“Gisuwerte pa sila karon, Benturada. Apan sa oras nga dili na makighigala kanila ang kahigayonan, mahulog na unya sila sa atong mga kamot.” -- Sumpayan pa