Paghinulsol

Sa nagsingabot na ang mga adlaw sa pagbalaan sa Semana Santa, nakahukom si Marman nga magbag-o na sa iyang kaugalingon. Nakasala siya sa iyang asawang si Lita. Nakasala siya sa iyang mga anak. Nakasala siya sa pulong sa hunahuna, sa buhat ug wa pagbuhat sa angay niyang buhaton. Gusto niyang limpiyohan ang kaugalingon diha sa mga mata sa atong Ginoo. Nakahukom siya nga maghinulsol sa tanan niyang mga sala.

“Unsa ka ba, Lita! Wa lagi ko magkuha og kuwarta sa imong pitaka! Wa na lagi ko manugal. Pisteng yawa!” singhag ni Marman sa iyang asawa nga igo lang nangutana kaniya kun wala ba kuhaa niya ang kinintos pesos ug gibagdok pagpalit sa swertres nga lotto.

Kadali da nga masuko si Marman sa iyang asawa ug klaro siyang namakak, tungod kay hilom man niyang gikuhaan og kinintos pesos ang sulod sa pitaka sa iyang asawa. Nagumon man gud siya sa pagsugal sa swertres nga lotto sa pamasin nga makatayming og daog.

Kadali ra usab siyang maninghag sa tulo niya ka  anak lalake nga sila si Henry, Boy ug Jimmy nga pulos na mga maestro sa publikong elementaryang eskuylahan sa siyudad human makapasar sa Licensure Exam For Teachers (LET). Kadali da siyang maningka sa tulo niya ka  anak, ilabi na kun dili dayon siya mahatagan sa iyang monthly allowance. Sa edad god nga pulos na 60, sila ni Marman ug Lita, wala na sila patrabahoa sa tulo nila ka  anak ug mao nay maghatag kanila og binulang alawans.

Hinuon, parehas sab nga magdawatan og binulang pensyon sa GSIS sila si Marman ug Lita, kay mga retirado man silang maestro ug maestra sa publikong eskuylahan sa elementarya. Way kalibutan ang iyang asawa ug mga anak nga moyuho lang siya’g pangabang og mga babayeng batan-on nga mugbo’g-lupad sa Junquera, bisan kun hunahuna na lay gadako ni Marman.

Nakasala usab si Marman sa relihiyusong kapunongan nga gisakopan nila ni Lita. Tungod kay maayo lang siya sa pulong apan wa nunti sa buhat. Wa niya puy-i sa kaugalingon ang mga pulong sa Diyos nga gipaambit kanila sa ilang nagpakabanang trihead servants.

“Paghinulsol kamo sa tanan ninyong mga sala. Batoni ninyo kanunay ang kinasingkasing ug matinud-anong pag-ampo ngadto sa Diyos. Palig-ona ninyo ang hugot ninyong pagsalig, pagtuo ug pag-ila sa Diyos! Atol ning kasaulogan sa kuwaresma ug pagbalaan sa mga adlaw sa Semana Santa, ikumpisal ninyo sa pari ang tanan ninyong mga sala....!”

Ug ning hapona, miapil si Marman sa naglaray paglingkod aron mokumpisal sa pari sa Santo Rosario Church. Ning kasaulogan sa mga adlaw sa Semana Santa, maghinulsol siya sa tanan niyang mga sala, tungod ug alang sa iyang asawa, mga anak ug sa relihiyosong kapunongan nga iyang gisakopan. Ug daw miluag ang dughan ni Marman nga naghulat na sa iyang turno sa pagkumpisal niadtong hapona. (Kataposan)