Pasalamat sa Inday-hilay

Ning udtoha, gidumdom ko ang usa ka balay kahilayan sa dalan Junquera nga maoy nahimo kong pugaran sa mga takna nga ganahan kong mosaw-saw og babaye diha sa binayrang kalipay. Buot lang nakong pasalamatan si Shirley, ang babayeng inday-hilay nga nahimo kong suki, samtang padayon kong nag-eskuyla sa kolehiyo, sa dakong unibersidad nga kanait lang sa dalan Junquera.

Pinaagi sa bugaw nga si Mariano, nakaila ko si Shirley nga nahimo kong suki diha sa pagbayad kaniya sa iyang presyo. Ang binulan kong alawans nga ipadala sa akong mga ginikanan sa Negros, akong katingan aron lang ko makapahimulos sa katam-is ni Shirley. May mga higayon nga malahap ko ang akong alawans tungod kang Shirley ug sa nakat-onan kong bisyo sa paghithit og shabu. Daghang higayon nga nakapamakak ko nilang papa ug mama nganong ma-short ko sa akong bayranan sa tuition fees matag bulan ug sa akong bayranan  nga binulan sa lodging house nga gi-estaran.

Nagkuha ko sa kursong Architecture. Nagsalig ko nilang Papa ug Mama nga di magkaproblema sa paghatag sa binulan kong alawans, kay nanag-iya man sila og 50 ka ektaryang asyenda sa tubo. Asyendero ug asyendera ang akong mga ginikanan. Gawas pa, pinangga ko nila, kay ako man ang kamanghuran sa lima ka anak.

“Nasayod kong anak ka og sapiang mga ginikanan, Henry! Pinaagi sa atong panagsuki, nakatigom gyud ko. Apan tambag ko nimo nga magbinuotan ka, ayaw padala sa mga barkada mong estudyante nga nagumon sa ginadiling droga! Dili ko gusto nga ma-short ka’s imong alawans tungod lang nako ug sa paghithit og shabu....!”

“Apan sukad ta magkasuki, magpangita na man ko nimo, Shir! Seksi ug bigot man gud ka’g lawas! Magluya ko, kun dili makasawsaw nimo. Nainlab man nuon ko nimo...!”

“Tungod kay suki na man gyud ta, librehon na tika sa pagromansa nako, basta biyai lang gayud ang paghithit mo og shabu. Gusto kong maka-gradweyt ka sa imong kurso, Hen...!”

“Salamat ha, Shir! Tungod nimo, tumanon ko ang sugyot mo....!”

Dili tiaw ang gibati kong kalipay, kay mora’g nahimo kong uyab si Shirley nga libreng makaromansa niya. Siya nay tigtambag nako. Hingpit kong gibiyaan ang paghithit og shabu ug mipukos sa pag-eskuyla sa akong kurso.

Kagabii, nakagradwar na gyud ko. Giimbitar ko si Shirley sa pagtambong. Apan wa siya makatunga. Buot ko siyang pasalamatan. Mao karon ang hinungdan nga ning udtoha, gidumdom ko siya dinhi sa dalan Junquera. Buot kong pasalamatan ang suki kong inday-hilay.

“Nag-rehearsal sila si Shirley kagabii, mao nga wa siya makatambong sa imong gradwasyon! Gradwasyon usab niya karong hapon sa Cebu Coliseum, Bay Hen! Mogradwar siya sa kursong Accountancy....!” tug-an sa bugaw nga si Mariano kanako.

Nahiugnok ko. Wa ko magdahom nga ang buot kong pasalamatan nga inday-hilay, hilom sab sab diay nga nag-eskuyla sa kolehiyo. Nakahukom dayon ko nga motambong sa gradwasyon ni Shirley karong hapon. (Kataposan)