Isla Paraiso - Gula 133

Wala maglangan si Rey. Dihadiha miligid siya sa salog. Halos dungan sa iyang pagligid mipaka ang masipang butobuto. Apan wala maigo si Rey.

Mibati si Rey og kalisod niining engkuwentro nga iya karong nasugatan. Maglisod siya pagluthang sa mga kaaway tungod sa kangitngit. Bisan tuod og naanad na ang iyang mga mata sa kangiob, apan lisod gihapon ilhon ang bulto sa bayhon sa usa ka tawo ilabi na kun gikan kining nagtago nga mikalit paggawas.

Apan nag-amping na lang si Rey sa iyang kaugalingon. Ania na siya sa sulod sa bodega ug wala nay panahon pa sa pagsibog. Nasayod siya nga sama kaniya, maglisod usab ang mga kaaway sa pagluthang kaniya. Iabi na nga itom nga diyaket ang iyang gisul-ob.

Nakahunahuna kadto si Rey sa pagtangtang sa puti nga panapton nga gibangan sa iyang ulo. Moamag man gud kini sa kangitngit.

Nakabati sa kasaba nga nahimo sa paghagsa sa putol nga kahoy sa salog, ang kaaway mipabuto sa iyang armas. Nakita ni Rey ang butho sa bayhon niini nga diha ra diay magpasalipod sa usa ka dakong haligi nga duol na kaayo sa iyang gihap-an. Diha-diha gipusil ni Rey ang kaaway nga napabor kaayo kaniya. Naigo kini. Nabuhian ang armalayit nga gigunitan niini ug dayon mihagsa kini sa salog nga wala nay kinabuhi. (Sumpayan pa)