Ang kamapaubsanon

Ingon sa nahalap ang panan-aw nila ni Sherlyn ug Mamer sa dayon nila nga pagrumbo sulod sa sinehan. Dunay flashlight nga misiga ug gigiyahan sila sa naggunit niini kun asa nga lingkoranan sila molingkod.

Apan wala sila molingkud sa lingkoranan nga gibanwagan sa kawani sa sinehan. Gipasiklapan ni Mamer kadtong bakante nga lingkoranan dapit sa daplin nga layo ra sa mga nanglingkod ug didto sila si Sherlyn nagpahimutang.

“Maayo dinhi kay dili ta nila madungog kun aduna ta’y panagsultihan,” giingnan ni Mamer ang dalaga. “Bitaw ‘sab,” dali kaayo nga nakatimang si Sherlyn. Mitutok usa sila didto sa tilon nga wala’y timik. Taud-taud, nakahuna-huna si Mamer nga sigurohon niya nga gisugot na siya ni Sherlyn. “I love you Sherlyn,” hagawhaw ni Mamer ngadto sa dunggan sa dalaga. Milingi kaniya ang dalaga ug sa hinay nga tingog gilitok ang pulong “I love you.”

“Salamat kaayo Sherlyn, sangko sa langit ang kalipay nga akong gibati karon nga wala nimo pakyasa ang akong gugma. Wala ko magtoo nga moabot kini nga sitwasyon kanato’ng duha,” matud ni Mamer. Gipislit ni Mamer ang palad ni Sherlyn. “Pwede ba og mo-kiss ko nimo Sherlyn timaan sa akong pagmahal?” daw paraygon kaayo ang tuno sa tingog ni Mamer. Milingi si Sherlyn kang Mamer nga nagpahiyom.

Wala na magpaabot pa si Mamer nga motangdo pa si Sherlyn. Anam-anam niya nga gipaduol ang iyang mga ngabil ngadto sa mga ngabil sa dalaga. Takulahaw lang nga nagdikit ang masi’g nila ka mga ngabil nga nagdimdim sa katam-is sa gugma. Katam-is nga wala’y sama ang nabatyag ni Mamer dihang nag-ukobay na ang masi’g ka mga ngabil nila ni Sherlyn. Gusto ni Mamer nga dili na mabugto ang mao nga mga gutlo sa ilang pagparayganay.

“Swerte kaayo ko nga gikaila ko ikaw Sherlyn. Labaw na nga giswerte ko nga wala madayon ang inyong kasal ug sa imong kanhi boyfriend,” giingnan ni Mamer ang dalaga. “Mao g’yud. Dili g’yud tingali mi swerte sa usa’g-usa Mer,” dali’ng tubag ni Sherlyn.

Tugob sa kamalipayon ang una nila nga panagdeyt sa sinehan. Gikan niadto, wala’y putol ang ilang panag-kontakay sa usa’g-usa. Kanunay na sila nga magkuyog ug diha’y higayon nga gikatagbo g’yud nila ang kanhi boyfriend ni Sherlyn.

Wala kini makaako sa pagpakigharong kang Sherlyn. “Sigurado ko nga nagmahay na kadto’ng imong boyfriend kaniadto Sherlyn kun ngano nga iya ka nga gisuko-sukoan sa wala’y igo’ng hinungdan,” ni Mamer pa. Usa ka hapon, adlaw’ng Biyernes, mi-text si Sherlyn kang Mamer nga nagpahibalo nga moapas siya sa trabahoan.   (Sumpayan)