Isla Paraiso
Sa kangitngit sulod sa bodega, nakahunahuna si Rey sa paggamit sa iyang plaslayit. Apan wala niya ipadayon ang iyang nahunahunaan. Delikado kun may kaaway na nga nakamatikod sa iyang pagsulod ug naghulat na lang kini sa hustong higayon sa pagluthang kaniya. Basin og inig pasiga niya sa plaslayit pusilon siya sa nanghupo nga mga kaaway.
Naghupo si Rey nga naglakaw sulod sa bodega. Midangop siya niadtong usa ka dakong haligi nga sama sa gilikisan sa kangiob. Gipaod niya ang iyang lawas sa haligi samtang nagpadayon sa pagpaniid. Milingi siya ngadto sa iyang gigikanan sa dakong pultahan. Nakita niya ang amag sa bayhon sa iyang mga kaubang polis nga mibutho sa kangitngit nga naghulat na lamang sa iyang mando. Apan hangtod niining mga gutloa dili pa niya pasudlon ang iyang mga kauban sa bodega. Wala pa niya matino kun dili ba kuyaw ang maong dapit alang kanila.
Taudtaod nga nagpabilin si Rey sa dakong haligi nga iyang gipasalipdan. Gianad niya ang iyang mga mata sa kangitngit. Pagkilab sa pipila ka gutling, ingon sa mihayag na og diyotay ang sulod sa bodega. Naanad na ang iyang mga mata sa kangiob sa palibot.
Lihokan kaayo ang mga mata ni Rey nga misuhid sa palibot. -- Sumpayan pa
- Latest
