Nakalitan

Hello  ni Aida human gikuha ang telepono sa butanganan kay nibagting. “Hello. Maayong buntag” tingog sa lalaki.  Matinahuron, pormal. “Kinsay imong tuyo?” ni Aida nga nipahiluna sa sopa sa ilang sala.

Alas diyes na sa buntag sumala sa orasan nga gibitay sa bungbong. Gibiyaan una niya ang gihiwa nga mga lamas ug utanon sa kusina. Hapit kada adlaw man siya mag-utan. Kay iyang bana nga si William, hilig og utan. Labi na’g tinunoan.

“Puwede ko makig-istorya ni Mr. Dante Bugnay?” sa pikas linya.

“Manghod na’s Dante sa akong bana. Apan wa man siya magpuyo dinhi. Karon, tua siya sa Saudi. Nagtrabaho sa usa ka ospital didto,” ni Aida.

“Wa kay contact number niya ma’am?” sa pikas linya.

“Wa ko kahibawo sa iyang selpon o land line didto,” ni Aida. Wa gyud siya tinuod kahibawo. Apan di lang niya dasigon ang nanawag nga motabang siya aron makontak iyang bayaw. Nasayod sab siya nga mahitungod ni sa credit card ni Dante nga wa niya bayri.

“Si Peter Manulat ni ma’am. Nagrepresentar ko sa Green Meadow Banking. Duna man goy credit card si Mr. Bugnay nga wa mabayri,” sa pikas linya.

“Wa gyud mi mahimo ana,” ni Aida.

“Puwede mi makig-estorya sa imong bana, ma’am?” sa pikas linya.

“Samot. Akong bana di gyud to manggilabot sa kinabuhi sa iyang igsuon. Niya pa, magsuon mi apan lainlain mig kinabuhi. Iya-iya mi’g sulbad sa among problema,” ni Aida.

“Hain man diay imong bana, ma’am? Nobenta mil ra may bayranan ni Mr. Bugnay. Amo lang ipakonbenser sa imong bana iyang manghod, nga trayenta mil na lang among dawaton,” sa pikas linya.

“Wa man diri siya. Tua’s iyang opisina” ni Aida.

“Anus-a man kaha imong bana mauli?” sa pikas linya.

“Karong alas sayis sa hapon,” ni Aida.

“Puwede ko motawag og balik?” sa  pikas linya.

“Puwede. Apan ambot lang kun makig-istorya ba ninyo,” ni Aida.

“Mamasin lang mi, ma’am,” sa pikas linya.

“Pero pahibaw-on lang ta mo. Lawyer ang akong bana” ni Aida sa malumo nga tono.

“Wa man ko mangutana unsay trabaho sa imong bana!” sa pikas linya. Pinasingka. Masuk-anon.

“Ay la’g kasuko! Gisultihan ta lang ka’s tinuod. Angay gani kang magpasalamat nga nakig-istorya ko nimo. Mahimo bayag bundakan tika’s telepono!” ni Aida. Nasinta sab.

“Sorry. Sorry, ma’am. Nakalitan lang ko’s imong gisulti. Salamat,” sa pikas linya. “Klik”.

Nakapanghupaw si Aida. Mao pay magsamoksamok, mao pay masuko. Apan naabot gyud sa hunahuna niya nga abogado gud ilang pakig-estoryahan. Mutabang man gani ang abogado og laing tawo.

Igsuon pa kaha? Pero nakaila siya’s iyang bana. Neutral ra gyud siya. Di mutabang sa nagpautang. Di sab mutabang sa nangutang. Bisa’g igsuon pa. Di manggilabot sa problema sa igsuon. (Katapusan)