Isla Paraiso

“Ug  nganong dili man?” Pakisayod ni Rey. “Dili ba nga mogawas ka na man sa kumbento?”

“Tinuod kana,” ni sister Veronica. “Apan samtang nia pa kining belo sa akong ulo, usa pa gihapon ako ka madre.”

Ingon sa napihaw ang nawong ni Rey.

“Sorry kaayo, s-sister Veronica...” laghaw ang tingog ni Rey. “Okey lang,” tubag sa madre. “Ug salamat nga nakasabot ka kanako.”

Human sila magkasinabot, si Rey nanamilit na kang sister Veronica. Migawas siya sa kumbento nga gihatod ni sister Veronica hangtod sa gate. Paggawas nila sa pultahan nga puthaw, nakita ni sister Veronica ang usa  ka renegade jeep nga nag-urong. Sa sulod, may usa ka polis nga naghulat.

“May kauban ka diay?” ni sister Veronica pa.

“Oo,” ni Rey pa. “Siya si Corporal David Benturada, kauban nako sa Theft and Robbery Section.” Ug ngadto kang Benturada, si Rey miingon: “Korporal, siya si sister Veronica.” “Hi! Giisa ni Benturada ang iyang mga kamot ug gipahiyuman ang madre.

“Hello!” Mibalos pagpahiyom si sister Veronica. Ug giatubang niya si Rey. “Nganong wala mo man siya pasudla sa kumbento kaganina?” -- Sumpayan pa