Wow kanay lawas!

Gula 5

“Bitaw Alfie, kun ako ang imong boyfriend, tagbawon g’yud nako ang akong kaugalingon pagakus kanimo,” giingnan ni Rodel ang dalaga.

Wala motubag si Alfie sa gisulti ni Rodel. “Ayaw lang kalain Alfie ha, pero maglaway g’yud ko nga magtan-aw sa imong lawas nga porma g’yud kaayo,” matud ni Rodel nga nangomedya sa dalaga.

“Tabla ka diay og irong-buang Rod kay maglaway ka man kaha,” gisuklan na lang ‘sab og komedya ni Alfie si Rodel. Nagkataw-anay sila’ng duha samtang gitabangan nila’g kaon ang gikuha ni Rodel nga usa ka platito’ng prutas.

Nakahuna-huna si Alfie nga human sa ilang pagpangaon ni Rodel molahos na lang siya pagkuha’g court clearance. Miyango-yango si Rodel ug taud-taud nakahukom nga ubanan na lang niya si Alfie.

“Suwayan nato pagduol ang akong amigo nga si Atty. Jeoffrey Joaquino nga maoy chief clerk of court sa RTC kay aron madali ta sa pagkuha og clearance,” ni Rodel pa. Nalipay kaayo si Alfie nga tabangan siya ni Rodel pagkuha og court clearance.

Wala g’yud tuod sila magdugay sa pagkuha og court clearance. Wala pa’y alas tres sa hapon naisyohan na og court clearance si Alfie. “Ugma na ‘sab ko mopadayon pagkuha sa ubang clearance kay police clearance na man lang og city health,” ni Alfie.

Gidapit ni Alfie si Rodel nga mouban sa iyang giabtan nga apartment. Wala g’yud mobalibad si Rodel kay ang tinuod ikalipay kaayo niya ang pagpakig-uban kang Alfie. Nanakay sila og PUJ gikan sa Capitol paingon sa gipuy-an ni Alfie sa Barangay Lahug.

Nanganaug sila unahan sa University of the Philippines (UP) ug misuot sila sa kabalayan atbang sa tunghaang elementarya sa Lahug. Hangtod nga didto sila mosangko sa usa ka balay nga kasarangan lang ang gidak-on.

“Mao ni ang akong gipuy-an Rod,” giingnan ni Alfie si Rodel. Gibuksan ni Alfie ang iyang shoulder bag ug gikuha niya ang usa pungpong sa mga yawe. Giyawehan ni Alfie ang siradora sa pultahan.

“Mingaw dinhi sa balay basta hapon Rod kay tua pa sa trabaho ang mga lodgers. Pulos man mi nagtrabaho ang nag-lodge sa balay. Kun wala pa ko maglukat og mga clearances wala g’yud untay tawo dinhi,” matud ni Alfie.

Nakagusto si Rodel sa sitwasyon nga sila ra ang anaa sa balay. Nahuna-huna ni Rodel nga makahigayon gayud sila og sultihanay si Alfie nga walay makatugaw kay sila ra ma’ng duha. Dili kaayo daku ang gipuy-an nga lawak ni Alfie apan limpyo ug hapsay.

Nanglingkod silang duha sa nagtupad nga lingkoranan. – (Sumpayan)