Wow kanay lawas! - Gula 4

Una nga nakahuman sa pagkaon si Rodel. Mitindog siya ug mikuha’g prutas nga para kanila ni Alfie. Sa iyang pagbalik, didto siya miagi sa likud nga bahin sa dalaga. Wala dayon siya mopaduol kay nasangit na usab ang iyang mga mata sa pagtutok sa maanindot nga lawas ni Alfie.

Gikan sa likud nga bahin, naaninaw g’yud ni Rodel ang gamay’ng hawak ni Alfie ug dayon ang daku niini nga bat-ang samtang naglingkod ang dalaga. Nakapasamot gayud kini sa iyang kaibog kang Alfie.

Unya, napalingi si Alfie nga nangita ni Rodel nga wala dayon mahibalik. Diha pa nga nasayran sa dalaga nga ang iyang bag-ong higala diha na diay nagbarog sa iyang luyo. “Uy anaa ka na man diay diha Rod?” matud ni Alfie.

Wala’y laing nahimo si Rodel gawas sa pagpahiyom. Giangkon niya nga taud-taud na siya nga nagbarog ug nagsud-ong sa dalaga. “Mobalik na unta ko paglingkod Alfie, apan ambot ba, nasangit man ko sa pagsige’g tinan-aw sa makabibihag kaayo nimo’ng lawas,” ni Rodel.

Nangyamiid si Alfie apan gipaubanan niya’g pahiyom. Nasabot ni Rodel nga wala masuko ang dalaga nga gisigihan niya’g tan-aw ang kaanindot sa porma sa iyang lawas. May nahuna-hunaan si Rodel. Mitukar na usab ang pagkaabtik niya sa mga babaye. “Pagkaswerte sa imong boyfriend Alfie no? Kun ako maoy imong boyfriend, ambot lang og may mga gutlo ba nga akong palabyon,” matud ni Rodel nga nagngisi ug nangomedya sa dalaga.

“Bilib na g’yud ko sa mga seaman kay abtik kaayo sa mga babaye. Tinuod ba gud na ang ilang giingon nga kada pantalan nga inyong dunggoan naa g’yud mo’y mga chicks?” matud ni Alfie. Abtik kaayo nga nakapamalibad si Rodel. “Tingali sa uban nga seaman apan ako buotan tawon kaayo ko Alfie. Gastoso man gud kaayo kun magbisyo. May gipatukod ko nga balay sa Yati, Liloan mao nga magtigum g’yud ko,” matud ni Rodel.

Nagpahiyom si Alfie nga nagtutok ug naminaw ni Rodel. Ingon sa iyang gitimbang-timbang kun nagtug-an ba kaha sa tinuod ang iyang amigo. Padayon usab si Rodel nga nagpasiklap sa lawas ni Alfie. “Tinuod bitaw Alfie, dili ko makasabot sa akong gibati kun magtan-aw ko sa imong lawas. Lupig pa nimo ang Miss Universe sa lawas,” gikomedyahan ni Rodel si Alfie aron dili na mauwaw kaniya ang dalaga.

Wala siya masayop. Pwerte nga nakakatawa sa dalaga pagkadungog nga gipanag-ing siya sa Miss Universe. “Bitaw Alfie, kun ako ang imong boyfriend, tagbawon g’yud nako ang akong kaugalingon paggakus kanimo,” ni Rodel. – (Sumpayan)