Wow kanay lawas! - Gula 3

Tuod wala madugay diha na ang amigo ni Rodel nga NBI agent. Gitunol kang Rodel ang clearances nila ni Alfie. Wala magdugay ang NBI agent, mibalik kini pagsulod sa opisina.

“Naa ra man diay na. May amigo man diay ka dinhi Rod wa na lang unta kita magkapoy-kapoy paglinya,” matud ni Alfie nga mipahiyom ug motutok ni Rodel.

Nagkasabot sila nga mangaon sa usa ka Eat All You Can restaurant nga malakaw ra gikan sa opisina sa NBI. Samtang naglakaw paingon sa restaurant, nagkalingaw pagsultihanay sila si Rodel ug Alfie.

“Unsay gamitan nimo sa NBI clearance Alfie,” gipangutana ni Rodel ang dalaga. Mo-apply lagi ko pagka-nurse sa Chong Hua ug gipangayoan ko og NBI clearance,” matud ni Alfie.

Gibawsan pagpangutana ni Alfie si Rodel kun asa niya gamiton ang iyang gikuha nga NBI clearance. Gitug-anan ni Rodel si Alfie nga gamiton niya kini sa pag-apply balik sa shipping company.

Iyang gitug-anan si Alfie nga bag-ohay lang siya nga nakakuha og lisensya pagka-second mate sa barko ug mosakay na siya’g balik. “Dakua gud diay nimo og sweldo Rod no?” matud ni Alfie.

“Igo-igo lang gud,” matud ni Rodel nga nagpahiyom. Miabot na sila sa restaurant. Si Rodel ang mibayad sa counter sa dayon nila nga pagsulod.

Nag-atbang sila paglingkod niadtong gamay nga lamesa nga para lang sa duha. Mitindog si Alfie kay mikuha og mango juice. Gisundan pagtan-aw ni Rodel ang dalaga.

Wala tuyoa ni Rodel nga mitubod ang iyang laway nga nagsud-ong sa maayo kaayo’ng pagkalalik nga lawas ni Alfie. Adunay gihanduraw sa kaisipan ni Rodel.

Mora og natulala si Rodel nga nagsige lang og tutok sa lawas ni Alfie. Nabasiyo kadiyot ang iyang huna-huna samtang naghanduraw ang iyang kaisipan.

“Uy Rod, naunsa ka uy,” matud ni Alfie nga wala na diay maalinggati ni Rodel nga diha na kini sa iyang atubangan. “Ay sori kaayo Alfie ha, naunsa man ko uy, nablangko man ang akong huna-huna nga naglantaw nimo nga nagkuha og juice,” ni Rodel pa nga mora’g nauwaw.

Gisuginlan ni Rodel ang dalaga nga nadani lang ang iyang mga mata pagsud-ong sa nindot kaayo niini nga lawas. Wala makapugong si Alfie sa pagpahiyom. “Pastilan g’yud ning taga barko no? Chickboy g’yud kaayo.”

Wala makatingog si Rodel sa gisulti sa dalaga. Naigo siya kay tinuod man ‘sab g’yud nga hilabihan niya pagkapalakero. – (Sumpayan)