Isla Paraiso

Gula 111

“Anhi ko dinhi mupaingon ning islaha,” si Rey namulong taliwala sa kahilom ni sister Veronica, “sa higayon nga may mabug-at akong suliran. Sa higayon nga nagkinahanglan og kaluag ang nagpuot sa akong dughan. Paborito ko kining dapita ilabi na sa mga panahon nga gusto akong makabaton og kalinaw sa hunahuna.”

Si sister Veronica igo lang mitutok kang Rey.

“Matahom kining islaha,” matud na usab ni Rey. “Angayan gayod sa iyang ngalan nga isla Paraiso.”

“Managsama diay kita’g panud-ong mahitungod sa katahom, Rey,” nagkanayon si sister Veronica. “Husto kaayo ka. Sama kanimo, ang ingon katahom niining maong isla maoy giila nako nga tinuod nga matahom. Beauties of nature. Wala nay molabaw pa katahom kay sa katahom sa kinaiyahan.”

“Abi mo, sister Veronica,” miliso si Rey ug miatubang sa madre, “sama ako sa nagdamgo nga gikauban ko ikaw karon. Mora ba’g dili ako makatuo nga gikauban ko ikaw karon ning maong isla.” Mikatawa si sister Veronica.”

“Nalipay na lang ko, sister Veronica,” ni Rey na usab,” nga bisan og nakahatag kanako’g insecurity usahay ang kondisyon nga gihatag mo kanako, apan mas mahinungdanon nga wala mo pakyasa ang gihalad kong gugma kanimo.”

“Dili ka angay nga mobati’g insecurity, Rey. Ingon man gayod niana ang kaalagian sa usa ka relasyon.” -- Sumpayan pa