Isla Paraiso

Gula 110

Daplin sa baybayon naglaray ang mga cottage nga gituyo paghimo alang sa mga dumuduong nga buot magpahayahay sa maong isla.

Untop gayod alas dos sa hapon nahiabot ang pumpboat nga gisakyan nila ni sister Veronica ug Rey sa maong isla. Ang sakyanan sa kadagatan gipangunayan pagdumala sa higala ni Rey nga maoy tag-iya niini. Pagdunggo gayod sa pumpboat sa dughan sa baybayon, sila si sister Veronica ug Rey nanganaog gilayon. Ang tag-iya sa pumpboat nagpabilin sa sakayan. Giagda kini ni Rey sa pagkanaog apan mibalibad kini ug mipasabot nga maghulat na lang kini sa ilang pagbalik gikang manuroy sa matahom nga isla.

“Kanindot niining islaha,” nakatuaw si sister Veronica samtang nagtupad sila si Rey pagpanglakaw sa timgas nga bunbon. “Wa ko magdahom nga aduna diay isla nga ingon niini katahom sa Sugbo.”

“Kaingon ka’g sa Boracay lang mapalgan ang ingon niini katahom?” Mikatawa si Rey.

Wala’y tubag.

Maoy girumbo nila ni sister Veronica ug Rey ang lapad nga bato nga nag-igdal taliwala sa bunbon nga maputi. Ang kilid nga bahin sa maong dakong bato gilabtikan sa nangapusgay nga mga balod.  Mipahiluna sila sa maong bato. Nagtupad sila. -- Sumpayan pa