Dili magsaba ang gaba

Igo pa lang gani nga nakatikang sa unang ang-ang si Miyoy, sa pinuy-anan ni Nisya, gisugat dayon siya sa babayeng tim-os ug dalisay niyang hinalaran nga nagkanayon:

“Layasssss .... dayonnnn ... Miyoyyyy ... kayyyy kasukaonnnn .... konggggg ... magtan-awww .... saaa .... imongggg ... hitsura!”

Maayo kaayo nga pagkadakin-as si Miyoy, ug naparok ang iyang ulo sa may pasamanso sa hagdan. Nangagas ang daghang dugo sa iyang ulo.

“Unsa may akong atraso kanimo Nisya, nga angay kang masuko kanako?” ni Miyoy pa nga sagol danguyngoy ang sinultihan.

“Basta lud-on lang gayod ako nga magtan-aw sa imong hitsura!” prangka siya nga gidaygan sa babayeng iyang gipaka-Bathala ning ilang dapit sa may balangay sa Kabatbatan.

“Panamin gud una ... kun angay ba kanang imong hitsura nga guwapo pay unggoy nga nakabuhi sa lasang?”

Nakapanumpa sa makadaghan si Miyoy, nga dili na gayud mopakita pa kang Nisya, aron mamisita sa ilang pinuy-anan.

Gigahin na lang niya ang tanang panahon, sa pagpadayon og bugwal sa iyang giuma sa may bukiran sa Kabatbatan.

Gipanamnan niya og mga lanubo nga lagutmon ug mga utanon, nga matag adlaw nga Sabado, atol nga may tabo sa dako nilang tiyanggihan ning ilang lungsod sa San Fernando, iyang pangunayan  og baligya.

Baligno sa panahon dili lang gayod hibaw-an, kay may usa ka makililimos nga mabdos ang misangpit sa iyang ngalan nga nagkanayon:

“Miyoyyyy ... palitiiii ..... intawonnnnn .... akooooo ogggg posoooo ....kayyyy akonggg ... ibahoggg .... saaaa .... onaaaaa .... saaa amahonggggggg!”

Nahalingi og kalit si Miyoy. Nahibulong siya kun nganong nakaila pa niya kadtong naglago nga babayeng makililimos?

“Nganong nakaila ka man kanako?” ni Miyoy pa nga nagpakisayod.

“Ako bitaw kadto si Nisya?” mubong tubag sa babaye.

“Biktima ako sa pasalig ni Siyoy, ang lalaking usa ka minyo!”

Wa kapugngi ang pagpanglugmaw sa luha ni Miyoy, diin siya nagkanayon: “Dili magsaba ang gaba Nisya!’’ (Kataposan)