Bad influence

Unsa na man sab kaha’y atong buhaton rong umaabot nga piyesta? Mora ma’g wa gyu’y kaayohan atong nadulot sa mga batan-on. Daghan man lang gihapong nagbisyo sa atong komunidad. Kanunay man ang bad influence sa mga batan-on. Wa may good influence,” ni Brando, presidente sa kapunongan sa mga concerned residents sa sityo Bulwang.

Nagtigum sila karong hapona kay duha ka semana na lang, piyesta na sa ilang sitio nga ang patron si San Diego. Sa naandan, nia ra sila sa kapilya magtigum. Nia si Archie, bise presidente, Dina, sekretarya ug tresurera, Isaiah, Nido ug Ferdie, mga sergeant-at-arms. Giporma lang nila’g lingin ang mga lingkuranan nga plastic. Ug nag-alirong sila’g lingkod. Sila ra ang giilang mga tubig-tubigang sakop sa ilang komunidad. Ug tarong mga tawo sa katilingban.

“Duna ko’y isugyot,” ni Archie nga niisa sa tuong kamot.

“Unsa man?” ni Brando.

“Nakamatikod ko nga ang mga tawong nagdako dinhi sa atong komunidad, unya mulampos sa pagtuon ug makasulod og maayong trabaho, mubalhin og puyo. Mamiya sa atong lugar,” ni Archie. “Natural kay di man sila gustong magdako ilang mga anak dinhi. Kay hugaw ug way kalinaw ning atong silinganan. Hapit kada-adlaw may magtawag og pulis kay may nagpinatyanay o may nag-pot session. Unsa may imong nahunahunaan?” ni Brando.

“Gusto ko nga ang atong mga kababata nga mga wa na diri magpuyo kay malampuson sa ilang pagtungha ug panarbaho, patambungon sa atong programa sa piyesta. Pasultihon sila tagsatagsa para pagdasig sa mga batan-on. Sila ang himuon natong good influence, batok sa mga bad influence sa atong mga silingan,” ni Archie.

“Uyon mi ana. Suporta mi anang sugyota,” halos magdungan og sulti sila si Dina, Isaiah, Nido ug Ferdie. Ug nahimo dayon ang resolution. Kay duna pa may mga paryente nahibilin sa ilang sitio, sila si Frank Manto, doctor, Mario Lisdan, abogado, Wendel Torre, piloto, Romy Gracia, kapitan sa barko, Ben Cortes, CPA ug June Teves, usa ka malampusong negosyante, dali ra silang makontak. Wa sila nibalibad kay dakong dungog nila ug kalipay nga nahinumdoman sa ilang mga silingan.

Malampuson ilang kalihukan sa piyesta. Ug nahimo na dayong tradisyon nga kada-piyesta, naa silang mga propesyonal nga produkto sa ilang sityo aron pagdasig sa mga batan-on. Namugna pa gyud ang dakong pundo sa salapi nga giamot-amotan sa mga pinasidunggang dinapit ug sa mga residente nga nagpakabana. Gitawag kini og Bulwang Scholarship Fund. Para sa mga batang may hait nga salabutan, apan dili kaabot sa bayranan sa mga tunghaan.

Paglabay sa lima ka tuig, nakita ang dakong kausaban sa ilang sityo. Nahanaw ang mga bad influence. Ang nagpabilin ang mga good influence. Nahimong modelo ang sityo Bulwang sa tibuok barangay. Ug hinayhinay nga nikatap ang ilang good influence sa silinganang sityo ug mga barangay. (Kataposan)