Isla Paraiso

Gula 107

“Buotan ug masinaboton kaayo si Rey, mother superior,” nagkanayon si sister Veronica.

“Nan, natimbangtimbang mo na ba karon kun hain ang mas bug-at alang kanimo? Ang imo bang bokasyon o si Rey?

Kalit miligdong ang panagway ni sister Veronica.

“Hangtod karon, mother Superior,” ni sister Veronica pa, “ingon sa maglisod pa ako paghukom.”

“Nakasabot ako sa imong kahimtang,” matud sa madre superyor. “Tinuod nga dili madalidali ang pagpakanaog og hukom ilabi na sa sama niining imong gidangatan nga usa ka komplikadong situwasyon. Hinuon, dako ang akong pagtuo nga moabot ang panahon nga matugkad mo na sa hingpit ang misteryo sa gugma.”

Usa niana ka adlaw, nahitungha si Rey sa kombento. Nahibulong pag-ayo si sister Veronica niining kalit nga pagtungha ni Rey sa kombento nga udtong tutok. Dili ginhapon nga moduaw kaniya ang ulitawo sa kombento sa ingon niarong orasa. Mao nga nahikugang gayod si sister Veronica.

“Gusto unta ko nga ikuyog ka,” nagkanayon si Rey.

“A-asa man ko nimo dad-a?” Sukot ni sister Veronica.

“Manuroy,” ni Rey pa. “Moadto kita sa Isla Paraiso.”

“Hain man kanang dapita? Karon pa man akomakadungog nianang imong gihisgotan nga Isla Paraiso?”

“Sakop gihapon kanang islaha sa Sugbo. Makadaghan na ako makaato didto.” -- Sumpayan pa