Isla Paraiso - Gula 102
Sa laing bahin, nahunahuna ni Rey nga miabot na ang panahon nga iyang gipaabot -- nga maangkon na niya ang gugma ni sister Veronica nga iyang gimahal ug gihigugma sa tibuok niyang kinabuhi nga karon usa na ka madre. Iya pa bang palabyon ang maong kahigayonan nga ingon sa nawad-an na sa kaidlas kaniya?
Nahanduraw niya ang kataas sa kutay sa panahon sa iyang pagpailob ug pag-antos aron maangkon niya ang gugma ni sister Veronica. Sulod sa dugay’ng panahon, ingon sa usa ka dangog kaayong isda ang kapalaran nga makahiplos sa iyang mga kamot. Ug karon ania, mianad na kaniya ang kapalaran. Apan may makababag lang. Kini mao ang kondisyon nga gihatag ni sister Veronica kaniya.
Kini ang gihinuktokan pag-ayo ni Rey.
Sa tantong pagtimbangtimbang ni Rey, misantop sa iyang hunahuna nga maoy mahinungdanon niining higayona nga maangkon na niya ang gugma ni sister Veronica. Dili na siya angay maghunahuna og lain. Ang importante mao nga sugton siya sa madre nga iyang gihigugma. Unya na siya motabok sa suba kun mahiabot na siya sa tampi niini. Tugob sa kahulogan ang pasumbingay nga gihunghong ni Rey sa iyang kaugalingon.
“Gimahal ko ikaw sister Veronica,†namulong si Rey pagkilab sa pipila ka daklit. “Mahinungdanon alang kanako ang pag-angkon sa imong gugma tungod kay dugay ko na kining gipangandoy.†-- Sumpayan pa
- Latest
