Police lover - Gula 3

Human sa pagsayaw ni Tina sa stage nga gisud-ong pag-ayo sa mga kustomer, misulod kini sa dressing room ug nag-ilis, dayon mideritso pagduol ang bar dancer ngadto sa lamesa nga gilingkoran ni Jack ug sa kauban niini nga polis.

“Dalia ra gud nimo nga nakailis Tin,” giunhan ni Jack pagtagad ang bar dancer nga wala na tuod magsul-ob og two-piece. Mitupad paglingkod si Tina kang Jack.

“Maayo kay mibalik g’yud mo Jack. Daghan kaayo’ng kustomer karon kay Sabado man gud,” ni Tina pa. Nakasabot si Jack nga dili kaayo makatagad kanila og dugay si Tina kay sigurado nga may uban kini nga customer nga naghuwat.

Human mahurot ang ta’g duha ka botelya nga beer nga gilibre kanila ni Tina, nananghid si Jack nga mogawas na sila. Apan sa wala pa mobiya sila si Jack may gihunghong ang polis sa bar dancer.

Nangayo diay si Jack og contact numbers ni Tina. Gi-encode ni Tina ang iyang numero ngadto sa selpon sa polis. “Sori ha? Daghan man gud nga kustomer karon,” ni Tina pa nga mihatud nila ni Jack gawas sa Wild Orchids Bar. Nagpahiyomay sila si Jack ug Tina sa dayon nila nga panaglagyo. Mibalik si Tina sulod sa bar. Gisugat siya sa floor manager ug giingnan nga adunay mga kustomer nga naghuwat kaniya.

Ang regular nga kustomer ni Tina nga si Bert maoy nagpaabot. “Dia ka diay Bert? Ganina ka ra?” gipangutana niya ang kustomer. Wala dayon makaila si Tina kang Bert kay nagsul-ob kini’g kawo ug gipayong-yong.

“Amigo diay mo si Inspector Jack Briones?” gipangutana ni Bert ang suki niya nga dancer. Natingala si Tina kun nganong nakaila sa polis ang suki niya nga kustomer.

Gisaysayan ni Tina si Bert kun ngano nga nagkaila sila og ang polis. “Hangyo lang nako nimo nga ayaw pakigsuod kaniya. Duna siya’y atraso sa among grupo dihang sakop pa siya kaniadto sa Vice Squad,” matud ni Bert.

Suod sila si Tina ug Bert kay dagko kini og ihatag kaniya nga tip sa mata’g higayon nga makigtibol ang bar dancer kaniya. “Anaa ra nimo ang pagtimbang-timbang. Kun makigsuod ka ni Jack, dili na ko makigsuod kanimo,” ni Bert pa. Nahibulong kaayo si Tina nganong nasuko si Bert kang Jack. Diha pa usab si Tina makabantay nga Inspector diay ang ranggo ni Jack. Opisyal diay kini sa kapolisan.

Dugay na nga si Bert nagsige og hangyo ni Tina nga magdeyt sila ug hatagan siya og dako nga kantidad apan gibalibaran gayud kini sa dalaga. Nagtungha si Tina sa koliheyo panahon sa adlaw. – (Sumpayan)