Isla Paraiso - Gula 101

“Dili ko matubag kanang maong pangutana, Rey,” matud ni sister Veronica. “Sa gikaingon ko na, kinahanglan nga ang kabubut-on sa Diyos maoy matuman sa akong kinabuhi.”

Miduko si Rey. Nakita ni sister Veronica nga napaak sa lalaki ang ubos nga ngabil niini. Unya  nakita sa madre nga gipiyong na gayud ni Rey ang iyang mga mata. Mura ba’g naghatag niini’g kalibog ang kondisyon nga iyang gihatag.

Miutong pa gayud ang kahilom. Gitutokan pag-ayo ni sister Veronica si Rey nga niining higayona, wala’y pupamilok ang mga mata nga gitutok sa salog. Mura ba’g gipangita sa lalaki didto sa salog ang usa ka ideya nga sarang ikasakbang sa pangatarongan sa madre.

“Kun dili ka makadawat sa maong kondisyon, Rey,” namulong si sister Veronica pagkilab sa pipila ka gutling, “gikasubo ko nga dili usab ako makahimo sa pagdawat sa gugma nga gihalad mo kanako.”

Si Rey nahiunlod sa halawom nga paghunahuna. Gipatidlom niya sa kinahiladmang bahin sa iyang kaisipan ang mga pulong nga gibungat ni sister Veronica. Gihinuktokan niya’g maayo ang kondisyon nga gihatag niini kaniya.

May kabalaka nga misaghid sa ngilit sa kahimungawong ni Rey. Dili ba kaha mausab ang hunahuna ni sister Veronica sa kapulihay ug mao gayo’y palabihon niini ang bokasyon sa pagka-madre? Simbako intawon! Dili siya buot nga mahitabo kini. -- Sumpayan pa