Police lover

Gula 2

Wala’y nahimo ang kapolisan gawas sa pagbuhi sa dinakpan nga snatcher kay dili man mopirma og reklamo si Tina. Gipasabot ni Tina nga hasolan na siya nga moadto pa unya sa hukmanan aron pagtambong sa husay sa kaso.

Gitawag ni Jack ang snatcher ug atubangan ni Tina gipasidan-an nga moundang na kini sa bisyo nga pagpanglabni. Nangayo’g pasaylo kang Tina ang snatcher ug nagpasalamat nga gipasaylo ra siya.

“Unya asa ka na man ron Tin?” gipangutana ni Jack ang bar dancer. “Moadto na lagi ko sa bar kay hapit na g’yud karon magsugod ang show,” matud ni Tina nga nagpaniklap na sa iyang relo. Mitanyag si Jack nga ihatud niya si Tina sa bar. “Part, andama ang sakyanan kay ihatod nato si Tina sa iyang gitrabahoan,” giingnan ni Jack ang kauban niya nga polis kinsa mitindog dayon ug miadto sa nag-parking nga patrol car.

“Tana Tin kay aron dili ka ma-late sa imong trabaho,” matud ni Jack. Dali ra sila nga miabot sa Wild Orchids Bar sa dalan Sanciangko nga gitrabahoan ni Tina. “Sulod usa mo, bangkahan nako mo og tag two bottles pasalamat nga wala malabni ang akong selpon,” ni Tina pa nga nagngisi.

Gipasabot ni Jack nga dili maayo tan-awon nga adunay patrol car nga mag-parking atubangan sa bar. Iyang giingnan si Tina nga ihatud usa nila sa police station ang patrol car ug mobalik ra sila dayon.

Nahimong espesyal si Tina ug gidayeg siya sa mga kauban niya’ng dancer nga nakakita nga gihatod siya’g patrol car sa kapolisan. Gisuginlan ni Tina ang iyang mga kauban nga si Jack maoy nakadakop sa snatcher nga milabni sa iyang selpon.

“Mobalik to sila karong taud-taud. Mga polis to sila diha sa Station 2,” giingnan ni Tina ang nagbantay sa pultahan sa Wild Orchids Bar. Wala g’yud tuod mamakak ang duha ka polis kay wala pa gani usa ka oras, nahibalik na sila’ng duha.

Dili sila mailhan nga mga polis tungod kay wala mag-uniporme. Nagsugod na ang pagsayaw sa mga dancer pagsulod nila ni Jack. Napasiga ang mga mata ni Jack pagkakita nga si Tina na maoy nagsayaw didto sa stage.

Nakakita kini kang Jack nga gikuyogan sa floor manager og didto gipalingkod sa lamesa daplin sa bung-bong. Mipahiyom si Tina ngadto sa polis nga bag-o niya nga nahigala.

“Swerteha nimo part nga imong naamiga kining maong dancer. Buotan na siya kay gikatibol namo na ni sir last month, dili g’yud na magpahikap-hikap gani,” matud sa kaubang polis ni Jack. (Sumpayan)