Police lover

Polis si Jack nga nadistino sa team nga gitahasan pag-responde kun adunay alarma nga madawat sa ilang police station. Sanglit wala man g’yuy alarma, nakahukom sila si Jack ug duha ka kaubang polis nga magkalingaw sila og patrolya sa ilang teritoryo.

Gipatrolyahan nila ang Osmeña Boulevard kay daghang pasahero nga mag-atang og sakyanan nga posible nga biktimahon unya sa mga mangunguot. Tuod, wala gayud masayop ang pangagpas ni Jack kay adunay babaye nga kalit lang misiyagit sa unahan.

Dayon nalantawan nila ni Jack ang usa ka lalaki nga kusog nga nagdagan paingon sa ilang nahimutangan. Nagpanglingi ang tawo nga nagdagan sa babaye nga misinggit og pakitabang.

Abtik nga milihok ang tulo ka polis. Nakasabot dayon si Jack nga snatcher ang tawo nga nagdagan. Gibabagan dayon ni Jack ang tawo ug nagsilbi nga back-up ang duha ka polis. Gisikaran ni Jack ang snatcher ug maayo nga pagkalukapa.

Wala mag-uniporme sila si Jack kay sakop sila sa detective section mao nga wala makamatikud ang snatcher nga dunay polis nga naniid sa mao nga dapit. Nabawi nila ni Jack ang selpon nga gilabni niini sa babaye.

Taud-taud, diha na ang babaye nga gilabnihan sa iyang selpon. “Salamat kaayo ninyo sir ha nga inyong nadakpan ang snatcher ug nabawi ang akong selpon. Inutang pa ra ba g’yud tawon ni ang gipalit aning selpona,” matud sa babaye.

Gidala nila ni Jack ang snatcher sa duol nga Station 2 sa Cebu City Police Office (CCPO) nga nahimutang atbang sa Camp Sergio Osmeña Sr. Gipauban usab nila ni Jack ang babaye nga gilabnihan sa selpon.

Didto nga gikaila ni Jack si Tina. “Pwede og dili na lang ko mopasaka og kaso kay hasol na kaayo. Wala na ko’y oras sa pag-atubang sa kaso kun husayon na sa korte,” giingnan ni Tina si Jack.

Gipasabot ni Jack si Tina nga kun dili siya mopasaka og kaso batok sa snatcher wala sila’y mahimo gawas sa pagbuhi niini ug hayan mamiktima na usab og lain. “Yuna, asa ka diay nagtrabaho Tin?” gisukna ni Jack si Tina.

Ingon sa nagpanuko pagtug-an si Tina. Gitutokan siya sa polis ug gisukna pag-usab apan sa hinigala nga tono sa pagpangutana.

Napugos sa pagtug-an si Tina nga usa siya ka dancer sa Wild Orchids Bar sa dalan Sanciangko. “Mao ba? Amo ra ba na nga area ang Sanciangko,” matud ni Jack. Nakapahiyom si Jack nga mitutok ni Tina.

“Bantog ra nga seksi kaayo ka’g lawas Tin kay dancer ka man diay sa bar,” ni Jack pa nga nagpabiling mitutok ni Tina. (Sumpayan)