Kapit patalim - Gula 7

Nasabotan nga rondahon inigka-gabii sa mga sakop sa City Anti-Indecency Board (CAIB) ang Lingam Massage nga nahimutang sa Barangay Kasambangan.

Nakumbinsir ni Grace ang iyang amiga nga si Gina nga maoy magsilbi nga informer didto sa massage parlor. Ang iyang tahas mao ang pagpahibalo dayon sa CAIB kun may law-ay na nga binuhatan nga gihimo.

Gibatbat g'yud ni Grace ngadto sa opisyal sa CAIB nga ang mga masahesta sa Lingam Massage mohapyud-hapyod sa kinatawo sa lalaki nila nga kustomer ug adto na magsugod ang law-ay nga serbisyo.

Ang mga reporters nga nag-cover sa City Hall gitugotan ni CAIB chairman Lucelle Mercado nga maka-uban sa raid. Sa wala pa sila mopaingon sa Barangay Kasambagan, duna pa'y mga masahean nga ilang gisusi mentras naghuwat sila sa abiso ni Gina.

Hapit na alas 12 sa tungang gabii nga mi-text si Gina kang Grace nga daghan na ang nagpa-lingam nga mga kustomer. Misirit ang sakyanan sa mga sakop sa CAIB paingon sa Barangay Kasambagan.

Hilit g'yud tuod ang nahimutangan sa Lingam Massage, layo ra sa karsada nga sagad agian sa mga sakyanan. Giduol dayon sa team ang nagbantay sa counter ug gipahibalo nga taga CAIB ang miabot ug mo-inspection.

Ang ubang sakop sa CAIB giubanan dayon ni Grace sa mga gagmay'ng massage room. Gitabilan ra og mga panapton ang pultahan sa kwarto. Ilang gili-li ang tua sa sulod.

Nakita gayud sa team sa CAIB ang gihimo sa masahesta nga mimasahe sa kinatawo sa lalaki nga naghayang. Nakurat ang masahesta dihang mikidlap ang flash sa camera sa usa ka sakop sa team.

Didto sa unahan nga massage room, laing masahesta ang nasakpan usab nga nag-lingam sa kustomer.

Migawas ang manager ug diha-diha siya nga giposasan sa polis nga kauban sa CAIB. Gipahibalo sa CAIB nga dad-on nila ang manager ug ang ubang masahesta nga nasakpan nga naghimo'g law-ay. Nakurat ang manager sa pagkakita niya ni Grace nga kauban sa CAIB nga mironda.

"Grace, kauban ka nila? Wala ka diay mo-duty karon?" daw natingala ang manager. "Makabawos na g'yud ko nimo sa imong kalampingasan sa mga babaye sir.

"Nagsultihanay na kami ni Dr. Mercado ug walay pyansa para nimo human ka namo nadakpan," pintok kaayo ang tingog ni Grace nga mitulisok sa manager.

Dunay abogado sa Lingam Massage nga mikontak sa cellphone sa asawa sa manager nga diha usab diay sa maong higayon. Wala magpabalda ang CAIB sa abogado nga mihangyo nga dili lang dakpon ang iyang mga kliyente.

"Salamat kaayo Ma'am, nakabawos na g'yud ko sa lampingasan nga manager nga milugos kanako," giingnan ni Grace ang pangulo sa CAIB. - (Kataposan)