Bahandi sa basurahan

Ning gabhiuna giandam ni Burog ang iyang kahimanan sa pagpangahig og basura. Ang sako nga maoy sudlan niya sa mga pinunitang basura, ang headlight nga may higot nga guma pangtaod sa iyang ulo ug nagsilbi niyang iwag sa kangitngit. Ug labaw sa tanan, ang talinis ug nag-arkong kabilya nga gitawag nila’g “kahig”.

Kahig, tungod kay gamiton kini sa mga basurero pagkahig sa mga basura nga ilang mahimuslan ug mabaligya.

Tuod man, nagdali si Burog sa pagkatkat niining nagbukid nga mga basura sa dumping site.

“Sakto kaayo karong taknaa, siguradong daghang huwad ang mga garbage truck nga gikan sa siyudad,” dihay kahinam si Burog dungan sa pagtulo sa iyang singot.

Unya pag-abot niya sa kinatumyan, aduna nay pipila ka mga sakyanan ang nagyabo sa karga nilang mga basura. Daghan na usab  ang mga tawo nga sama kaniya nangindahay’ng mga basurero.

Bisan pa sa kabaho sa tibuok palibot ug gipalibotan sa dagkong mga lagong, wala maglangay si Burog ug giablihan dayon ang dalang sako, dayong pamili sa mga basurang dili pa lang dugay gihuho.

Matag gabii, mao kini ang iyang gimbuhaton. Dili siya makahigayon pagpangahig sa adlaw tungod kay nagtungha usab siya sa elementarya.

Sa edad nga kinse, nagpabilin pa intawon si Burog sa grade five sanglit nakahunong siya sa pagtuon kaniadto tungod dili makaya sa iyang amahan ang mga gastuhonon nga proyekto ug alang sa inadlaw’ng balon.

Mamasurahay ra usab ang iyang amahan ug ang kinitaan niini igo lamang nga makahupay sa naghapdos ug gutom nilang mga tiyan.

Apan tungod sa iyang mga pangandoy, giantos ni Burog ang pagpangahig og basura dinhi sa labayanan aron aduna siya’y magamit sa pag-eskwela. Ug ang uban halin, ihatag usab niya sa masakitong inahan.

“Kanindot sa akong mga klasmeyt karon, siguro naghimo na sila sa ilang mga assignments. Unya nindot kaayo ang ilang pagkatulog samtang ako ania.”

Nagpanglingo si Burog, nga nagpabiling nagkahig-kahig sa mga hugaw.

“Hala! alahas!!! mga alahas....” dihay kalit nga misinggit sa unahan.

Usa ka basurero nga nakakaplag og bahandi sa basurahan.

Dili kini bag-o alang kanila. Gani ang uban nakakita og dagkong kantidad nga kwarta, kung dibuynason dolyar pa gayod.

“Hayahaya nila uy, naka jackpot na  pud!” ni Burog nga adunay nagpahiping kaibog sa iyang nabatian samtang nagpadayon sa iyang buhat.

Taud-taod lang, napuno ang iyang dalang sako sa nagkadaiyang basura. Dihay plastic, lata, puthaw, aluminum ug gagmay’ng bronse.

Mapahiyumon siyang midulhog ug naglukdo niining nagtaghoytaghoy.

“Dili man ako sama sa uban nga gipakatawo’ng adunahan, dili man ako sama sa ubang basurero nga nakakaplag og bahandi. Apan kining akong halin karon maoy dakong tabang sa akong pagpadayon pagtungha. Ug igo na kaayo kining isipon kong matuod nga bulawan,” tuaw sa basurerong si Burog. (Katapusan)