Sakit usahay ang kapildihan

Ang tanang abogado, gimanduan sa Canon of Professional Ethics nga tratahon gyud ang ilang mga fellow lawyers isip brother lawyers, or at least, mga higala. Apan di kalikayan nga dunay mga abogado  nga mahimong personalan ang ilang panagbangi. Bisa’g ila lang mga kliyente ang nagburoka, may mga higayon nga ang nag-atbang duha ka abogado, magkaaway sab. Dunay higayon libakon lang nila ilang abogadong gikalagotan.

Unya kun magkahimamat, motimbaya lang gihapon. Ang mga abogado haniti sab anang giingong plastikan. Labi na nga duna sab tali nila ang gitawag og discrimination. Ang mga abogadong gikan sa mga sikat nga law schools, dunay ubos nga pagtan-aw sa mga abogadong gikan sa mga law schools nga gidungog nga mapalit ang diploma. Apan ang bar exams di man mapalit.

Duna man goy taas og standard nga mga law schools. Kanang dili modawat og working student o self-supporting students. Busa ang mga self supporting students, adto lang makaeskuyla sa law schools nga ubos og standard. Mao ning matanga sa law school ang gigikanan ni Atty. Randy Ubanok. Apan alang niya, it’s not the school, but the student that matters. Sa pagdaug sa kaso, alang niya, di kinahanglan nga maayong laki gyud ang abogado. Igo na nga ang balaod ug ebidensiya pabor sa iyang kliyente.

Sa usa ka kaso, nakaatbang ni Randy si Atty. Manny Bagawong, usa ka dean sa sikat nga law school. Private prosecutor si Manny sa kasong attempted homicide batok ni Serge nga silingan ug kababata ni Randy. Nagpabuto lang si Serge og dagkong firecrackers sama sa Super Lolo ug Goodbye Philippines, sa bag-ong tuig. May silingang gisabaan, gikiha siya’s silingan og attempted homicide. Nagpalaban ni Randy si Serge.

Kay tataw man nga nagsibag ang nagkalainlaing mga pahayag sa mga testigos nga binayran, naabswelto gyud si Serge. Sukad adto, di na motagad ni Randy si Manny. Gisakitan siya’s iyang kapildihan nga napildi lang og self-supporting student sa law school nga low standard. Samtang si Manny gikan sa sikat nga law school, dean pa gyud sa iyang alma mater, ug full time student nga ginastohan sa iyang amahan nga usa sab ka abogado. Sa panultion pa, dili tanang kusog modagan maoy kanunay modaug sa lumba. Duna lay talagsaong higayon nga ang tawo mahimutang sa tukmang dapit sa tukmang panahon. (Kataposan)