Isla Paraiso

Gula 95

“Apan kun imong masuta nga mas bug-at gayod ang imong bokasyon alang kanimo, ang kumbento bukas alang kanimo sa tanang higayon, sister Veronica.” Nagkanayon ang madre superyor.

“Dili pa ko gustong mobiya sa kombento, Mother Superior.”

“Anaa ra kana kanimo. Makahimo ka sa pagpuyo dinhi bisan kanus-a sa imong gusto. Sa pagkakaron, tambagan ko lang ikaw nga ayaw una hingpita ang pagluwat sa imong bokasyon. Human mo dawata ang gugma ni SPO3 Corpuz, mao na kana ang higayon nga angay mong sutaon kun nahigugma ka ba gayud kaniya sa tinud-anay. Ug kun segurado ka sa imong kaugalingon nga gihigugma mo gayud siya ug dili na mausab ang imong hukom, dili usab ako magpugong kanimo.”

“Daghang salamat, Mother Superior, nga hisabtan mo ako.”

“Sa gikaingon ko na, sister Veronica, managsama kitang babaye. Wala’y katarongan nga dili ko hisabtan ang imong kahimtang.”

Sa dako uyamot nga kalipay nagakos ni sister Veronica ang madre superyor.

Nianang pagkasunod gabii, si Rey mitungha sa Orchids Sisters Convent. Sa hilom gikulbaan si sister Veronica niining paghibutho karon ni Rey sa kombento. Nakahukom na siya nga sugton ang ulitawo. Apan sa mata’g karon ug unya tentalon ang iyang hunahuna sa pagduhaduha labot sa iyang desisyon.

Apan ania na si Rey. Busa ang iyang hukom iya nang ipakanaog. -- Sumpayan pa