Sinaw nga bato

Samtang naglingkod sa nag-igdal nga gamot ilawom sa dakong punoan sa mangga, nga atbang sa ilang balay ni Lilay, nadapit ang pagtagad ni Binong sa usa ka sinaw’ng bato diha sa ibabaw’ng bahin sa nagtubo nga bungdo sa kilid sa punoan sa mangga. Sama ang gidak-on sa sinaw’ng bato sa usa ka itlog sa manok.

Mitindog si Binong sa iyang gilingkurang igdal nga gamot  ug miduol sa nagtuybong bungdo kilid sa punoan sa mangga.

Gipunot niya ang sinaw nga bato, ug gisulingsuling nga gipatong sa tuo niyang palad. Hilabihan ka sinaw ang maong linging bato. Usa ka buhing bato nga lahi ra kaayo sa mga bato nga nagpasad sa banika ug sa tibuok palibot sa nataran sa balay nila ni Binong ug Lilay. Unya, kalit nga may nabating tagming nga tingog si Binong.

“Makahatag og swerte sa imong kinabuhi ang maong sinaw nga bato, Binong...!”

Nagkalingilingi si Binong sa palibot aron pagsusi sa tag-iya sa tagming nga tingog.

“K-kinsa ka? H-hain ka....?”

“Dia ra ko sa tumoy sa bungdo, Binong...!”

Nahasiga ang mga mata ni Binong sa iyang pagduko. Maoy nasugat sa iyang panan-aw ang gamay’ng linalang nga nag-akin-akin paglingkod sa tumoy sa bungdo. Taas ang buhok ug bungot. Usa ka duwende!

“H-higalang duwende? I-ikaw ang tag-iya sa sinaw nga bato...?”

“Oo, Binong! Hibawo ko nga hilig kaayo ka sa sugal nga bulang sa bulangan sa lungsod sa Liloan, matag Domingo...!”

“Mao lagi! Apan ning buntaga karon, wala ko moadto sa bulangan. Tulo na ka Domingo nga dimalas ko, maoy hinungdan nga giaway ko ni Lilay, kay hapit ko mahurot pagsugal ang puhonan sa among negosyo sa pagpaninda og bulad sa tiyanggihan...!”

“Naluoy bitaw ko ninyong magtiayon, ilabi na nga wa gyud mo makabaton og anak! Makabawi ra ka, Binong, sa tanan nimong pilde sa bulangan, pinaagi sa maong sinaw nga bato...!”

H-ha? Unsaon man paggamit kining sinaw’ng bato....?”

“Isulod mo lang sa bulsa ang sinaw’ng bato. Sa matag sultada sa bulangan, kupti lang ang sinaw’ng bato ilawom sa imong bulsa. Unya, pangutan-a ang sinaw’ng bato kun unsay modaog? Biya ba o inilog? Kun moinit ang bato iniglitok nimo sa biya o sa inulog ba, mao kana  ang seguro nga modaog ug maoy pustahi...!”

“Mao ba, kun mao, moadto ko’s bulangan sa lungsod ron....?”

“Timan-i, Binong! Sa matag pamulang mo, kutob ka lang sa napulo ka sultada ug ilugro-lugro ang pusta.....!”

“Sige, tumanon ko ang tanan, higalang duwende...!”

“Basta ayaw lang sab og kalimot, nga amumaha ug galma gyud pag-ayo kining pinuy-anan kong bungdo sa kilid sa dakong punoan sa mangga. Paninguha nga dili kini mapapas ug mapatag, aron mapahimuslan mo ang birtud sa sinaw nga bato....!”

Ug niadtong adlawa, miadto dayon si Binong sa bulangan sa lungsod. Gidala niya ang tinipigan ni Lilay nga usa ka libo ka pesos aron ilugro-lugro niya pagpusta kun mosalir ang birtud sa sinaw nga bato. Ug tuod man, sulod sa 10 ka mga sultada, wa gyud mapildi si Binong. Ang usa ka libo ka pesos niyang puhonan, miabot kapin sa tunga sa milyon ka pesos nga gisiyotsiyot niya’g pusta. Hilom nga nakapasalamat si Binong sa higalang duwende nga maoy naghatag niya sa sinaw nga bato. (Katapusan)