Two Lovers

Gula 7

Daw sangko sa langit ang kalipay nga gibati ni Virgilio dihang giangkon na niya si Rosemarie sa unang gabii sa ilang pagpanag-uban pagpuyo.

“Nalipay g’yud ko Rose kay abi mo, human ko na-basted sa akong pagpanguyab nimo kaniadto, wala na g’yud ko manguyab pag-usab,” matud ni Virgilio human sa ilang pagparayganay.

Malipayon ang panag-uban nila ni Rose ug Virgilio. Gipaundang ni Virgilio sa pagtrabaho si Rose sa gidumala niya nga kompaniya. Nag-atiman na lang kini sa ilang panimalay.

Usa ka udto, nakadawat si Virgilio og text gikan ni Rose. “May daku ta’ng problema Vir, pauli dayon.” Nakuyawan si Virgilio kay dili na makontak ang iyang selpon.

Igo lang gisultihan ni Virgilio ang iyang secretary nga aduna siya’y adtoon dayon misirit siya pagpauli sa balay. Sa iyang pag-abot, nakabantay si Virgilio nga adunay laing tawo sa balay.

“Unsay nahitabo Rose?” matud ni Virgilio sa dayon niyang sulod sa pultahan. Napasiga ang mga mata ni Virgilio kay nakita niya nga naglingkod sa lingkoranan si Jeffrey nga bana ni Rosemarie.

Naniga ang mga mata ni Virgilio kay matud ni Rose nga daku ang iyang pagtoo nga patay na gayud ang iyang bana. “Ikaw ba kini bai Jeffrey? Ingon kay patay ka na?” ni Virgilio pa.

“Taas na kaayo ang sugilanon bai Vir. Apan dihang nadagsa ko sa gamay’ng isla sa Batangas nasagop ko og mananagat apan nasakit ko’g amnesia,” ni Jeffrey pa.

Gisaysay ni Jeffrey nga nabalikan siya sa iyang maayong panghuna-huna dihang nalunod ang gisakyan nila nga bangka samtang miuban siya pagpangisda sa nakasagop kaniya.

“Gipangita dayon nako ang akong asawa paghiabot nako dinhi bai Vir, apan nasayran nako nga nagkatipon na diay kamong duha,” subo ang tuno sa sinultihan ni Jeffrey.

Nakita ni Virgilio nga nagsugod na sa paghilak si Rosemarie. Nagpabiling hilom si Virgilio. Wala masayod unsay iyang isulti ug unsa’y iyang buhaton.

Taud-taud, nakahukom si Virgilio nga andam siya nga magpasakit pag-usab ug palay-an niya si Rosemarie. Napagakos si Rosemarie kaniya ug midanguyngoy.

“Rose, ikaw maoy akong pagbut-on kun kinsa kanamo ni bai Virgilio ang imong unongan. Andam usab ako nga magpasakit kun si bai Vir ang imong pilion,” ni Jeffrey pa.

Misamot pagdanguyngoy si Rose ug migakus na usab sa namingawan niya nga bana. Nakahilak na usab sila si Virgilio ug Jeffrey.

“Nakat-on na ako pagmahal nimo Vir, apan wala usab mahanaw kanako ang gugma ngadto ni Jeffrey,” matud ni Rose. “Nakasabot ko Rose apan kinahanglan nga may pilion ka kinsa kanamo ang imong unongan,” ni Virgilio.

“Lisod kaayo ang paghukom apan sori kaayo Vir, bisan og nakat-on na ko pagmahal kanimo apan asawa gihapon ko ni Jeffrey busa siya ang akong unongan,” matud ni Rose. - Kataposan