Valentine’s Day Espesyal: Tanghaga sa nagsanga nga dalan

Valentine’s Day sa gabii ug nakita ni Mar ang nagparisparis nga babaye ug lalaki nga malipayong nanuroy sa Mall ug ang pipila kanila nangaon sa sulod sa mga  dekalidad nga kan-anan. Gibati niya ang kasina nga nagsud-ong kanila nga maoy nakaaghat kaniya sa pag-adto sa  panimalay sa hinigugma nga mi-indian kaniya.

Nakita ni Mar ang ilang kamalipayon ug dakong sukwahi sa iyang kahimtang nga nag-inusara nga naghambin ang galamhan sa tumang kamasulob-on nga naghunahuna kang Maruha nga iyang hinigugma nga kalit lang nahanaw ug wala gayod niya igkita.

Milingkod si Mar sa lingkoranan ug gipaliraw iyang panan-aw sa palibot sa pamasin nga  makita pa kaniya si Maruha niining gabhiona apan maoy masawod sa iyang panan-aw ang nagparisparis nga managhigugmaay nga naggunitay  sa kamot samtang nanglakaw sulod sa Mall.

Mitindog si Mar ug mihinay sa paglakawlakaw sa palibot ug naghanduraw sa iyang kaugalingon sa mga higayon nga iyang gikakuyog si Maruha sulod sa  pagpanan-aw og sine ug  pagpangaon sa mahalon nga kan-anan.

“Kini lang ang ako Mar,” ni Maruha pa usa ka higayon niana. “Pine apple juice.”

“Mangaon man kaha ta,” ni Mar pa. “Nganong kana ra man ang imo.”

“Busog ko Mar,” tubag usab ni Maruha. “Ikaw lang ang kaon.”

Kini maoy naandan nga himoon sa  iyang hinigugma sa matag sulod nila sa mga de kalidad nga kan-anan. Dili mokaon sanglit kanunay kining mobalibad nga busog kay nagkaon na daan sa paggikan niini sa ilang panimalay.

Nagpuyo si Maruha sa dakbayan sa Lapu-Lapu ug dakbayan sa Mandaue usab si Mar.  Nagtungha si Mar sa ikaduhang ang-ang sa kolehiyo sa usa ka unibersidad sa dakbayan sa Sugbo ug sa campus sa maong tulunghaan niya ikahimamat si Maruha nga naglingkodlingkod samtang nagpaabot sa oras sa iyang klase.

Ang ilang panagkaila maoy nahimong sinugdanan sa ilang panagsuod hangtod nga nagkasinabtanay ang ilang tagsa-tagsa ka mga pagbati. Nahimong madasigon si Mar sa iyang pagtungha hangtod nga migradwar kini sa kurso nga Industrial Engineering ug nakasulod og trabaho sa usa ka construction firm sa siyudad.

Bisperas sa Valentine’s Day.  Nagkita sila si Maruha ug nahingpit niya ang pag-angkon sa pagkababaye dihang wala na kini modumili sa iyang pag-agda nga mosulod sila sa motel niadtong gabhiona.

Malipayon sila sa ilang pagpanggawas sa motel ug gibati na lamang ni Mar ang kahibulong dihang mihangyo kaniya ang dalaga nga magpahatod sa ilang panimalay sa nagsanga nga dalan sa dakbayan sa Lapu-Lapu.

Una pa kining higayon nga makita ni Mar ang panimalay sa dalaga kay kasagaran nga iya kining ihatod kutob lamang sa Poblacion sa merkado publiko sa dakbayan sa Lapu-Lapu kay dili na man kini mosugot nga adto niya ihatod sa tugkaran sa ilang panimalay.

Daw palasyo ang panimalay nila ni Maruha nga nahimutang sa nagsanga nga dalan. Ug bisan sa kangitngit sa gawas sa ilang panimalay niadtong gabhiona apan nabantang sa panan-aw ni Mar ang harianong panimalay  ni Maruha nga maoy hinungdan sa iyang pagtuo nga adunahan ang kahimtang sa iyang hinigugma.

Hinay nga nagpadagan si Mar sa giluwanan niyang motorsiklo sa pagtimaan sa dalan nga iyang gisubay sa tuyo nga dili na siya maglisod sa pagtultol sa panimalay ni Maruha sa higayon unya sa pagbalik sa maong dapit.

Usa ka adlaw. “Maayong hapon, Noy,” ni  Mar pa nga nagsakay sa iyang motorsiklo nga miduol sa tigulang nga nagdaob  sa gabot sa iyang pagbalik  usa ka adlaw niana.

“Maayong hapon sad, Dong.” Sa tigulang pa nitan-aw kang Mar. “unsay ato nimo?”

“Asa na man diay ang dakong balay dinhing dapita?” ni Mar pa ngadto sa tigulang.

“B-balay Dong,” naisa ang kilay sa tigulang.Sukad sa gamay pa ko hangtod karon nga natigulang na ko, wala gyoy balay dinhi sa nagsanga nga dalan sa sitio Abuno sa barangay Pajac ug barangay Bankal, gawas lamang nianang dakong punoan sa kahoy nga giingon nila kaniadto nga gipuy-an sa mga engkanto.”

Gibati ni Mar ang kahadlok sa iyang nabati nga gisulti sa tigulang. Mihuros ang bugnaw nga hangin nga nakapalimbawot sa iyang balahibo nga maoy nakaaghat kaniya sa pagpabulhot og padagan sa iyang motorsiklo sa pagpauli sa ilang panimalay. (Katapusan)