Ang dugo sa kamot ni Gudo

Girakrakan sa kakulba si Dayot pagkakita sa kamot ni Noy Gudo nga nagkadugo, pag-gawas sa balay  niini huma’g ingon niya’g “Ayo! nay tawo?” Nabatyagan niyang nikurog ang kalibutan. Mituyok ang iyang palibot. Midagan ang iyang kalag biniyaan ang iyang kaugalingon. Tungod sa kahadlok.

Bag-o man gud kining nakagawas sa prisohan si Noy Gudo tungod sa kasong murder nga 20 ka tuig pod niyang giserbisyohan sa bilanggoan. Mao kini iyang nadunggan sa mga baba sa tsismoso ug tsismosa nilang silingan. Pero nagbag-o na man kuno kini si Noy Gudo. Nagpaduol na sa Ginoo. Mosangyaw na sa ebanghelyo. 50 anyos kapin ang pangedaron ug komedyante na.

Karon pa siya kabawo nga mao diay kini ang balay ni Noy Gudo. Kung nahibaw-an pa kuno may pa wa na lang siya mohapit dinhi rong hapona aron pagsugyot nga kinahanglang manglimpyo sud ug gawas sa balay rong panahona aron malikay sa sakit nga dengue, nga gisangon kaniya ni Kapitan Tanpika, kay usa man siya sa mga barangay health workers.

“Unsay ato, Dong?” matud ni Noy Gudo nga nagtan-aw-tan-aw sa iyang palad nga nagkadugo. Naamang si Dayot.

“Nganong mora man ka’g nahadlok, Dong? Nangluspad?” ni Noy Gudo.

“Nagkadugo man gud nang imong kamot, Noy?” ni Dayot nga nagkanga-kanga.

“A, ay’g kahadlok. Dugo ni sa akong gipangpatay...”

“Nakapatay na pod ka Noy!” ni Dayot nga misakgaw dayon, wa pa gani kahuma’g sulti si Noy Gudo.”Abi ko’g nagbag-o na ka Noy?” ni Dayot nga daling mikuot sa iyang cellphone.

“Gipatay ko sila kay naghatag sila’g kadaut sa atong katilingban,” nidiyong si Gudo. Na-serious.

Nabuang na gyud kini si Noy Gudo. Misuol na pong pagka-kriminal niini. Nagkanayon ang hunahuna ni Dayot. Kinahanglang mokalit siya pagkusog dagan palayo. Apan naunhan siya’g sulti ni Noy Gudo.

“Ay’g paglihok!” matud ni Gudo.

“Ayaw Sir...” ni Dayot nga nanglimbawot sa nakitang mata ni Noy Gudo. Wa na lang gud niya panumbalinga ang lamok nga nagsakdap-sakdap sa pislat niyang ilong. Tambok kaayo kining lamoka.

“Patyon tika rong buanga ka!” ni Noy Gudo nga isog kaayo’g nawong mora’g tigre.

“Ayaw tawon Sir,” ni Dayot nga nakakita ni Noy Gudo nga miaksyo’g tuok kaniya.

Gipiyong na lang niya iyang mata. Nadungog na lang niya ang kusog kaayo nga “Pak!” Gihinay niya pagbuka iyang mata ug nakita niya ang dako kaayong lamok nga maayo gyud nga pagkapisat sa palad  ni Noy Gudo nga nagkadugo.

“Patay ka laging buanga ka!” matud ni Noy Gudo. Nakapangagho si Dayot ug naglumbag dagan paubos ang iyang fear pressure. (Katapusan)