Isla Paraiso

Gula 86

Miligdong ang nawong sa madre superyor sa atubangan ni sister Veronica. “Abi mo, sister Veronica, ang angay mong buhaton mao ang pag-atubang sa kamatuoran.”

“U-unsay buot mong ipasabot?”

“You must be honest with yourself.”

Miduko si sister Veronica. Naghunahuna.

“May pagbati ka ba   usab alang kaniya?” Nangutana ang madre superyor.

Ingon sa nasud-ipan si sister Veronica sa pangutana sa madre superyor. Miduko siya. Gilikayan niya ang tinan-awan sa madre superyor nga ingon sa nagatugkad sa iyang pagbati.

“Nahigugma ka ba usab kang SPO3 Corpuz, sister Veronica?” Misukot pag-usab ang madre superyor sa dihang wala motubag si sister Veronica.

“Mother superior, tabangi ko,” ang nasulti lamang ni sister Veronica.

Apan igo na kadto alang sa madre superyor. Nakakita na siya’g gamay’ng anago sa kahayag nga nagtug-an kaniya kun unsa ang anaa sa kahiladman ni sister Veronica. Inanay niyang natugkad ang pagbati sa madre.

“Abi mo, sister Veronica,” mipahiyom ang madre superyor,” gilisudlisod mo lang gayod ang imong kaugalingon.” Nahapatan-aw si sister Veronica sa madre superyor pagkadungog sa giluwatan nga mga pulong niini. -- Sumpayan pa