Salamat sa kawatan - Gula 7

Nasabot ni Lando nga gikahinangop usab kaayo ni Femarie ang subli nila nga panagtagbo. Nanglingkod sila didto sa lamesa nga gireserba na’ng daan ni Lando para kanila.

“Gimingaw na kaayo ko nimo Fem uy,” wala g’yud maglipud-lipod si Lando nga mitug-an sa iyang gibati ngadto sa dalaga. “Pareho bitaw ta nga gimingaw sa usa’g-usa Lan,” sagbat ni Fem nga mitutok sa ulitawo.

Nagtinutokay sila’ng duha. “I love you Fem,” gilitok ni Lando ang mao nga mga pulong samtang giukoban sa iyang panan-aw ang matahom nga panagway ni Femarie.

“Angay pa ba gud nga litokon pa nako ang susama nga mga pulong Lan? May panultihon man gud nga action speaks louder than words,” ni Femarie pa nga nagpahiyom kang Lando.

Napiyong makadiyot ni Lando ang iyang mga mata sa hilabihang kalipay. Gigunitan niya ang tuo nga kamot ni Femarie. Nahuna-huna ni Lando nga kun anaa pa sila sa dapit nga walay laing makakita, gigakos na niya si Fem.

“Wala g’yud ko magdahum Lan nga kadtong hitabo nga mugna sa kawatan nga mikuha unta sa akong selpon maoy nakagiya sa atong panagkaila ug pagminahalay,” matud ni Femarie.

Miorder sila og makaon. Tugob sa kalipay ang ilang mga kasing-kasing. “Dili lang ta manuroy karon kay trabaho pa ugma.

“Ugma sa gabii ta mag-usab og deyt and let’s morning the night,” nangomedya si Femarie ni Lando. “Ang gipasabot nako pwede ta magbuntagay ugma,” dugang ni Fem.

Gihatud ni Lando si Femarie sa gipuy-an niini sa dalan D. Jakosalem. Sa wala pa mobiya si Lando, gipatikan niya’g hawok ang lumoy kaayo’ng lips sa dalaga. Lalim kaayo ang gibati ni Lando.

Wala g’yud dayon siya makatulog nianang gabhiona. Giteksan niya si Femarie ug gitug-anan sa iyang gibati. Giangkon usab ni Fem nga susama sila og gibati – kalipay.

“Kanindot unta kun subra pa’s hawok ang akong matagamtam sa deyt nato ugma Fem,” text ni Lando sa dalaga. Wala madugay, nakadawat siya’g reply. “Pwede ra basta pangasaw-on g’yud ko nimo.”

Misamot nga daw naglumpayat sa kalipay si Lando kay nakasabot siya nga mosugot ra si Femarie kun dad-on niya kini sa pribadong dapit nga sila ra’ng duha aron wala na’y makabalda sa ilang pagparayganay.

“Basta baya Fem ha? Yes, pakaslan g’yud dayon tika Fem,” gipasaligan ni Lando si Femarie pinaagi sa gipadala niya nga text reply. Pagka-ugma, nagkita na sila si Fem ug Lando. Giadto sa ulitawo ang dalaga sa gitrabahoan niini nga boutique.

“Unya, asa man ta paingon?” matud ni Fem nga nagpahiyom. Nasimhot ni Lando ang kahumot ni Fem nga nangalimyon. - Kataposan