Isla Paraiso

Gula 83

Ang madre superyor diay maoy didto sa gawas. Gidali ni sister Veronica pag-areglar ang iyang kaugalingon. Gisudlay niya ang iyang buhok. Unya giablihan niya ang pultahan sa iyang lawak.

“Mahimo bang magsulti kita?” Nagkanayon ang madre superyor nga seryoso kaayo ang panagway.

Wala motubag si sister Veronica. Apan gisenyasan niya ang madre superyor sa pagsulod sa iyang lawak. Milingkod siya sa ngilit sa iyang kama samtang ang madre superyor naglingkod sa usa ka silya nga nahimutang duol sa lingin nga lamesa duol sa may altar. Taudtaod nga mipataliwala kanila ang kahilom. Gipasiklapan ni sister Veronica ang madre superyor. Namatikdan niya nga mitutok kini kaniya.

Nasayod na si Veronica kun unsay pakigsultihan sa madre superyor kaniya. Naseguro niya nga wala malilong niini ang iyang suliran mahitungod kang Rey. Sa pagpunay’g balikbalik ni Rey sa kombento sa pagpamisita kaniya, iyang namatikdan nga ingon sa nakasabot ang madre superyor sa tumong sa ulitawo.

Miutong pa gayod ang kahilom. Mao ray ilang nahimo ang pagtinan-away. Ang usa’g-usa kanila ingon sa naghulat nga maoy mobuak sa kahilom.

Apan wala’y igsusulti si sister Veronica. Ingon siya sa naabisan sa dila atubangan sa madre superyor. -- Sumpayan pa