Isla Paraiso - Gula 80

Niining higayona, gisiksik pag-ayo ni sister Veronica ang iyang kaugalingon. Buot siyang magmatinud-anon sa pag-ila kun kinsa gayod si Rey sa iyang kinabuhi.

Kabata niya si Rey. Suod nga higala hangtod sa nadagko ug nahingkod na sila hangtod nga misangko ang tanan sa pagpangulitawo niini kaniya. Suheto siya sa kinaiya ug pagkatawo ni Rey. Dili kalimod nga gaan ang iyang pagbati ngadto sa maong lalaki, kaha tungod sa kabuotan nga nahuptan niini. Apan bahin sa gugma, aduna ba siya’y pagbati nga ingon niini alang kang Rey? Kini maoy buot niyang sutaon sa iyang kaugalingon.

Taudtaod nga misalom si sister Veronica sa halawom nga pagpamalandong. Ang diha sa iyang hunahuna mao si Rey. Nabatyagan niya karon nga ingon sa may talagsaong pagbati nga misayaw sa iyang kahiladman.

Diyos ko, tabangi ako! Nakasangpit siya sa labaw’ng Makagagahom kay iyang namatikdan nga ingon sa pagabuntogon na siya sa tawhanong pagbati!

Nakaamgo si sister  Veronica nga karon may luna na si Rey sa iyang kasingkasing.  Nalukmay ang iyang pagbati sa wala’y hunong nga pagpangaliyupo sa lalaki sa iyang gugma.

Apan ang gahom sa iyang bokasyon mihawid pa sa sidsid sa iyang kahimungawong. Gimahal niya ang iyang bokasyon.

Ug dili siya buot nga matuis sa pagkabakak ang iyang gisaad sa iyang kaugalingon. Huyang gayod ako. Huyang! Gidutlan gayod ako sa pagsulay. Ug misamot kakusog ang bul-og sa iyang mga luha. -- Sumpayan pa