Wrong number

Gula 6

Gitiman-an g’yud ni Nards ang adlaw nga walay trabaho si Nanet. Gusto si Nards nga iya kining bisitahan didto sa gipuy-an sa dalaga.

Tuod, miabot ang Domingo nga maoy day-off ni Nanet. Sayo kaayo nga mibangon si Nards ug nangandam alang sa pagbisita niya sa dalaga. Wala na siya mopahibalo pa sa dalaga nga karong adlawa siya mobisita.

Gusto ni Nards nga masurpresa niya si Nanet. Wala siya malimot sa gisulti ni Nanet nga ang balay nga iyang gipuy-an pinintalan og green unya nahimutang tupad sa usa ka botika sa dalan Katipunan.

Sa front seat sa PUJ milingkud si Nards aron sayon ra kaniya ang pagtan-aw sa mga botika nga adunay balay nga green ang kolor sa tupad. Tuod, nasigpatan niya ang iyang gipangita.

Layo-layo na sa botika si Nards nga nakakanaug. Gipayungyong og gamay ni Nards ang iyang gisul-ob nga kawo aron nga dili kaayo bantang nga makita ang iyang panagway.

Gipislit ni Nards ang buzzer nga nahimutang sa kilid sa ganghaan sa balay. Nadungog niya nga mitingog didto sa sulod. Giusban pagpislit ni Nards. “Kadiyot lang,” matud sa tingog didto sa sulod.

Mibukas ang pultahan. “Kinsay nangita?”si Nanet ang mibukas sa gamay’ng pultahan sa gate. “Uy, hala ikaw man diay kini Nards!” matud ni Nanet nga nagpahiyom. “Ako lagi Netz, gibisitahan tika kay miss na miss na kita,” sagol komedya ni Nards.

Igo lang mipahiyom si Nanet ug gipasulod si Nards. “Nasurpresa g’yud ko sa imong pagbisita nga wala ka mopahibalo nako Nards. Molakaw ra ba unta ko, di g’yud unta ta mag-abot,” matud ni Nanet.

Nakabantay si Nards nga bag-ong kaligo si Nanet kay basa pa ang iyang buhok. Wala g’yud masayop si Nards nga gwapa si Nanet. Bisan og wala kini makapangareglar sa iyang kaugalingon apan milutaw gihapon ang iyang kaanyag.

“Maayo kay nakatultol ka sa akong gipuy-an nga wala man g’yud ko mohatag nimo og tukma nga lugar,” ni Nanet. Mipahiyom si Nards ug naghuna-huna og unsaon niya sa pagsulti nga makasabot si Nanet sa iyang tumong.

“Kuan Netz, makatultol gayud ang usa ka tawo kun ang iyang gipangita mao ang iyang gimahal,” matud ni Nards nga mitutok kang Nanet. Karon pa makabantay si Nards nga nangalimyon sa kahumot ang dalaga.

“Kahumot nimo Netz uy,” matud ni Nards. “Mao bitaw ni ang perfume nga imong gipalit para nako. Tungod niini, dili g’yud ko makalimot nimo,” sa dalaga pa. - Sumpayan