Wrong Number
Nagdali si Nards paghuman sa iyang trabaho kay nagsabot sila si Leo nga magkuyog pagpanuroy sa dakung tindahan sa North Reclamation Area (NRA).
Kini maoy sagad himoon sa managhigala mata’g Sabado. Suod kaayo nga maghigala sila si Nards ug Leo nga usahay ingnon gani sila nga suod pa sa managsuon.
Kalit lang mitingog ang call alert sa iyang selpon. Nagtuo si Nards nga si Leo na ang mitawag kaniya apan numero ra ang migawas nga nagpasabot wala kini marehestro sa iyang phone book.
Gipasagdan ra ni Nards kay nagdali siya sa paghuman. Hapit na ang alas singko sa hapon nga maoy ilang gikasabotan ni Leo nga magkita sila sa silong sa gitrabahoan niya nga opisina.
Nahunong ang pagtingog sa iyang selpon, apan pagkataud-taud diha na ‘sab. Gitubag na lang ni Nards aron mahibaw-an kinsa ang nanawag. Tingog sa babaye ang iyang nadungog.
“Sori ma’am, wrong number ka,†matud ni Leo nga abtik kaayo nga mibutang sa iyang selpon. Gibalik na usab niya ang iyang mga tudlo ibabaw sa iyang laptap.
Apan wala pa gani makatuslok og litra si Nards sa iyang laptap mitingog na usab ang iyang selpon. Gitan-aw ni Nards ang selpon ug mao gihapon ang nanawag.
Gipasagdan ni Nards ang pagsige’g tingog sa iyang selpon. Wala niya tubaga. Taud-taud, nahunong ra ang pagsige’g tingog. Nahuman na ni Nards ang iyang trabaho ug gihatag niya sa iyang manager ang kopya sa iyang draft.
“Nakalakaw na si sir, sa Lunes na lang ni nako ihatag,†matud sa secretary sa manager.
Mibalik si Nards sa iyang lamesa kay mag-andam na aron manaug paingon sa silong sa ilang opisina kay hapit na gayud alas singko sa hapon. Apan mitingog na usab ang call alert sa iyang selpon. Mao gihapon ang numero nga nanawag.
“Ma’am, sayop gihapon nga numero ang imong nadayal,†giingnan ni Nards ang babaye sa pikas. Nanaug si Nards sa lobby apan wala pa si Leo.
Mitingog na usab ang iyang selpon nga mao ra gihapon ang numero nga nanawag. “Ma’am, ako man lang gihapon ang imong natawag, wrong number ka,†matud ni Nards nga mora’g napikal na.
“Ha? bisan giunsa nako og dayal ang numero, anha man g’yud sa imong selpon mokontak,†pasabot sa tingog sa pikas linya nga mora’g nagkatawa.
Nakapahiyom na lang ‘sab si Nards. Maayo na siya’g buot kay wala na siya magdali sa iyang trabaho. “Ako diay si Nanet. Maayo pa’g mag-amigo na lang ta sir,†matud sa tingog sa pikas linya. – Sumpayan
- Latest
