Call Center Agent - Gula 4

Nalingaw g’yud sila si Gemma ug Nelson pagtan-aw sa mga Sinulog contingents. Nalipat na lang gani si Gemma nga kinahanglan pa siya nga mangandam kay mo-duty pa sa call center diha sa Barangay Lahug.

“Dili diay pwede nga mo-absent sa imong trabaho?” gisukna ni Nelson si Gemma. Naghinuktok kadiyot ang dalaga nga mora’g adunay gihuna-huna.

“Sige uy, teksan lang nako ang among supervisor nga dili ko maka-duty kay walay masakyan. Ako lang ingnon nga grabe ka traffic,” matud ni Gemma.

Hapit na mahuman ang Sinulog Grand parade ug nanulod sila si Nelson ug Gemma sa Cebu City Sports Center. Misamot sila nga nalingaw kay pulos na nindot ang mipahigayon og pasundayag.

Human g’yud sa Sinulog Grand parade ug sa Finale, nakahukom pa gayud sila si Gemma ug Nelson nga manuroy na lang. “Asa man ta, adto ta sa SRP kay dunay banda didto or adto ta sa Mango kay dunay disco,” giingnan ni Nelson si Gemma.

Nakahukom sila nga mag-disco na lang sa Mango Avenue kay nakadungog sila nga dunay disco human sa Sinulog. Misamot ang ilang kasuod didto sa diskohan.

Pareho sila si Nelson ug Gemma nga miinom og beer. Dihang nakahurot na og duha ka botelya nga light beer si Gemma, mibati kini og kalipong apan padayon sila nga misayaw.

Ang nainum nga beer ni Gemma inanay nga nagsugnib og pagkaparaygon niya ngadto kang Nelson. Tabian ug komedyante na kaayo si Gemma.

“Sakita sa akong sampot uy, mora man ni og nabun-og,” matud ni Gemma nga mipasiklap ni Nelson. Mora’g gipanid-an niini og unsay reaksyon sa ulitawo sa iyang gisulti.

Tuod, daw nakuyawan si Nelson. “Ha? Ngano man, diin man kana mapangka? Sa atong pagsayaw?” sunod-sunod ang pangutana ni Nelson samtang mitutok ni Gemma nga naghuwat sa iyang mga tubag.

“Wala man kini mapangka. Kadto gud kaganina samtang nagtan-aw ta sa Sinulog contingents nga kanunay mabangga niadtong gahi kaayo sa imong atubangan tungod sa pagduot-duot sa tawo,” ni Gemma pa.

Daw nakalitan si Nelson. Wala dayon makatingog apan nakita niya nga nagpahiyom si Gemma. Nasabot niya nga nangomedya ra kini. Naghuna-huna si Nelson kun unsaon niya pagtubag ang komedya ni Gemma.

“Unsa diay imong gihuna-huna kaganina Son?” gisukna ni Gemma si Nelson samtang nagkayungit na’g gamay ang iyang sinultihan. “Lain ang imong gihuna-huna no?” dugang pa g’yud ni Gemma. Nakahukom si Nelson nga angkonon na lang nga gibati siya og grabe’ng kahinam kaganina sa mga higayon nga mabag-id ang iyang atubangan sa sampot sa dalaga. - Sumpayan